Bremen-in Bayern an chelh

Inrinni zan Bundes-liga inkhelah Bayern Munich an chak zo lo, German champion hi an mikhual Werder Bremen nen 1-1 in an inhnehtawk a, league table-ah erawh hmahruaitu an ni chhunzawm.

Mikhual Bremen tan Maxi Eggestein chuan chawlhlawk hma chiahin goal hmahruai a khung a, inkhel chawhnuh lamah Bayern lamin Kingsley Coman hmangin an sut - France winger hian  Leon Goretzka cross chu a tauh lut.

Bayern tan captain Manuel Neuer chuan innghahna tlak a nih zia a lantir. German international hian Josh Sargent leh Ludwig Augustinsson te goal khung tur ṭha takin a dansak, kum 34 mi ni tawh mah se a la che rang hle.

Second half-ah Bayern lamin inkhel an thunun zawk a, si phurh an sut bakah Douglas Costa chuan goal bar a tih per dawp. Bench aṭanga lut Eric Maxim Choupo-Moting chuan chakna goal khung theihna hun ṭha nei mah se Leroy Sane cross chu yard nga lek aṭanga hla aṭangin a pet out luah.

Match 50 chhung Bayern kaihruai tling chiah Hansi Flick chuan, "Nidanga hun ṭha kan insiam ang kha kan siam thei lo. Theih tawp chu chhuah mah ila eng emaw lai kha kal fuh tawk lo a awm zel, chutih rualin kan khingpui Bremen khan point hmuh phu khawpin an khel ṭha," a ti.

Bayern hian an player pawimawh ṭhenkhat - Corentin Tolisso, Alphonso Davies, Niklas Sule leh Joshua Kimmich te an chhawr thei lo a, an ṭhat dan berin an khel thei lo.

German coach hian season hmasa khan Beyern Munich hi Bundesliga mai bakah Champions League nomawi hial a chawipui. Kuminah pawh champion tura rinkai an ni leh dawn. Nilaini zan hian UCL group match khel turin RB Salzburg an mikhual zui leh nghal ang.