Salah nge Mane? A la chiang lo!

World Cup khelh hun a hnai a, 'khawvela ennawm ropui ber' tia an sawi ṭhin inelnaah tel ngei tumin ram hrang hrang an inel suau suau a, tel a châkawm bawk a ni.

Khawmualpui hrang hrang aṭangin inelna hmachhawn tur la chiang fel vek lo mah se, engemawchen chu a chiang tawh hlawm a, Africa aṭang erawhin khel tur a la hriat loh vek.

Mahse, zaninah chinfel a ni vek dawn thung - Africa hian World Cup-ah hmun panga an nei a, zanina inkhel panga hmangin football inelna ropui bera an khawmualpui aiawh tur a hriat dawn.

Ngaihven hlawh zual zingah zan dar 10:30-a Senegal-in Egypt an mikhual tur chu sawi hlawh ber a ni a, Liverpool chhuanvawr Sadio Mane leh Mohamed Salah intawng tur an nih avangin a awm lo hran lo.

Pen khat chauh
AFCON final-a Senegal-in Egypt an hneh avanga Mohamed Salah leh a ṭhiante hliam a la dam fel lo a, an hliam tuam damna ṭha ber tur chu zanin an inkhel tur hi a ni.

Playoff match hmasa zawkah Egypt hian 1-0 in Senegal hi an hneh tawh a, Salah-a shot chu Chelsea keeper Edouard Mendy chuan dang mah se bar a per a, a per lehlam hian Saliou Ciss chu perin goal-ah a lut.

Mahse, hei chu first leg chauh a ni a, Senegal-in zaninah comeback an beisei dawn. Hriat tel atana ṭha erawh away goal rule hman a la ni a, khualmuala goal khung lo Senegal tan goal nawr tluk zetin tlarhnung ven fimkhur a ṭul dawn.

Mahse, Senegal dinhmun ṭha lo belhchhah turin Abdou Diallo chu Egypt nen an intawn hmasakah a inhliam a, Paris Saint-Germain defender a awm loh chuan Kalidou Koulibaly kawp turin Pape Abou Cisse a lut ang.

Senegal an ṭha
Lehkhaa en mai chuan team pahnihah Senegal chu ṭha zawk an ni a, World Cup khel lo tur chuan an uiawm - keeper Mendy thiamzia hi kan hriat sa a ni a, Koulibaly lah Napoli rinrawl niin club langsar zawk nena sawizawm hlawh reng a ni.

Crystal Palace midfielder Cheikhou Kouyate pawh a ṭha tawk a, defensive midfielder Idrissa Gueye hi PSG tan tun season-a match 26 khel tawh a ni bawk a, an chhe lo.

Tlarhmaah Mane ṭhatzia inhrilh nawn a ngai lo a, Liverpool forward kawppui turin Alanyaspor striker Famara Diedhiou leh Watford forward Ismaila Sarr an awm bawk a, Egypt tan tlarhnung ven a ṭul dawn.

Egypt-in tlarhmaah Salah an nei a, Aston Villa aṭanga February-a Istanbul Basaksehir a pan hnua match ngaa goal li khung thei Trezeguet leh Galatasaray forward Mostafa Mohamed an neih tel avangin Senegal tan mahni muala goal chhuah lo tura fimkhur a ṭul ang.

Nigeria vs Ghana
Ghana khelmuala team pahnih intawn hmasakah goal a lut lo a, zanin dar 1:30-ah Nigeria-in Ghana an mikhual ve thung tawh dawn - World Cup khel atana itawm team pahnih zinga pakhat zawk chu zaninah an beiseina a tawp dawn.

Nigeria hian tlarhnunga ding turin Watford defender William Troost-Ekong an nei a, tlarhmaah Leicester City winger Ademola Lookman, Napoli striker Victor Osimhen, Watford striker Emmanuel Dennis leh Foxes forward Kelechi Iheanacho an nei bawk.

Ghana hi Michael Essien te hunlai anga sawi vul chuk tur tam lo mah se team ṭha pangngai tak an la ni reng a, AFCON group stage-a an tlak avanga fan-te thinlung hliam thawi dam turin zaninah chak an mamawh tel bawk - World Cup hnuhnung ber kha an khel lo tawh.

Black Stars (Ghana sawina) hian Foxes defender Daniel Amartey, Crystal Palace forward Jordan Ayew, AS Roma forward Felix Afena-Gyan leh West Ham leh Swansea City tana lo khel tawh André Ayew an nei a, Nigeria hneh turin an ṭha tawk.

Cameroon beiseina
Algeria leh Cameroon inkarah, World Cup khel tura duh zawk thlan tur ni se thlan a harsa ang - mahse, playoff-ah an inhmachhawn miau avangin a khawi emaw zawk zawk chuan World Cup an khel dawn lo a, zanin dar 1:00-ah an chingfel dawn.

Playoff first leg-ah Cameroon-in an mikhual Algeria chu 1-0 in an ngam lo a, Islam Slimani chuan inkhela goal awmchhun hi a khung - khualmuala goal nei chungin Algeria an ṭin.

Algeria hian Manchester City forward Riyad Mahrez, AC Milan midfielder Ismael Bennacer leh Galatasaray midfielder Sofiane Feghouli te an nei a, Cameroon tan comeback a harsa dawn - African football ram ropui ni reng ṭhin hian World Cup an khel phak loh a nih chuan mualphona nasa tak a ni dawn.

Cameroon tan Lyon forward Karl Toko Ekambi, Bayern Munich forward Eric Maxim Choupo-Moting leh AFCON top scorer Vincent Aboubakar te mawhphurhna a sang ang - Aboubakar hi match hmasaah a inhliam a, mahse, zaninah a hliam hi dam fel hman tura beisei a ni.

Morocco & Tunisia
Hun engemaw chen hnua Morocco team ṭhat vanglai tak a ni a, mahse, khualmualah Congo chu 1-1 in an inhnehtawkpui hram - AFCON-ah champion an beisei laiin quarterfinal bak an thleng lo bawk.

Fan-ten World Cup khelh ngei a duh a, an beisei ram thlenpui tur player pawh an nei ṭha tawk - Sevilla forward pahnih Youssef En-Nesyri leh Munir El Haddadi, Fiorentina midfielder Sofyan Amrabat, Wolverhampton Wanderers defender Romain Saïss leh PSG defender Achraf Hakimi an nei.

Morocco vs Congo ang thoin, zanin dar 1:00-ah Tunisia leh Mali an intawng dawn a, inkhel hmasa zawkah Tunisia hian 1-0 in khualmualah hnehna an chang - zaninah mahni muala inkhel tur an ni a, tlang an inbeisei ang.

Mali tan first leg-a own goal khung a, red card hmutu ni bawk Standard Liege defender Moussa Sissako chu a inlan thei dawn lo a, Amiens defender Mamadou Fofana chuan a hmun ruak a luah thei ang - Mali player tam zawk hi European top five league-a khel an ni a, Tunisia tan namnul a chi loh ang.

CAF World Cup Playoff - First Leg
Congo DR 1 - 1 Morocco
CON: Yoane Wissa 12'
MOR: Tarik Tissoudali 76'

Cameroon 0 - 1 Algeria
ALG: Islam Slimani 40'

Mali 0 - 1 Tunisia
TUN: Moussa Sissako 36' (OG)

Egypt 1 - 0 Senegal
EGY: Saliou Ciss 4' (OG)

Ghana 0 - 0 Nigeria

March 29, Zanin Inkhel Tur - Second Leg
Senegal 10:30 PM Egypt
Nigeria 10:30 PM Ghana
Algeria 01:00 AM Cameroon
Morocco 01:00 AM Congo DR
Tunisia 01:00 AM Mali

• Africa-in World Cup-ah hmun panga an nei a, Confederation of African Football (CAF) hnuaia ram 54-ten first round aṭangin he hmun ruak hi an inchuh.
• First round-ah hian CAF ram zinga FIFA ranking-a a sang zual 26 chu an la inlan ve lo a, second round an lut nghal. Ranking-a hniam zual ram 28-te chu first round-ah hian double leg match hmangin an inkhel a, team chak zawk 14-te chuan second round-a team 26 chu an zawm.
• Second round-ah hian team 40 chu group 10-ah ṭhen an ni leh a, group pakhatah team pali zel an awm. Group tina team-te an intum kual vek a, group tina a ti ṭha berte chuan third round an lut.
• Third round hi tuna an khelh mek hi a ni. A intum turte hi draw neih leh a ni a, home & away-a vawi hnih an inkhelh hnuah, inkhel pahnih belhkhawma chak zawk team-te chu World Cup khel turin an tling ang.
• Away goal rule hman a ni a, inkhel pahniha inhnehtawk an awm chuan khualmuala goal khung tam zawk chu tlang tur an ni.