Messi inkhel chu hlim taka en mai tur - Scaloni

Argentina coach Lionel Scaloni chuan Lionel Messi a dahsang hle a, an captain inkhel lai chu hmuhnawm ti taka en mai tur a nih thu a sawi a, player chuan chuai hun an neih avangin an vanglai a rei lo tih a sawi bawk.

Messi awmna Argen-tina hi Qatar World Cup khel turin an tling tawh a, qualifying match khelh hmabak pahnih an la neih zinga pakhat chu Nilaini zingah an khel ang - anmahni ang bawka tling tawh Ecuador an lenchilh ang.

Argentina coach Scaloni chuan, "Nakinah eng nge lo thleng dawn kan hre lo a, kan hmu lawk thei hek lo. Chuvangin a inkhel hi hmuhnawm ti taka en mai tur a ni, mihring ve tho a nih avang erawh chuan engkima duhthusam a awm thei bik lo," a ti.

Scaloni-a'n a enkawl chinah Argentina hian nasa takin hma an sawn mek, kum 28 chhung an nghah hnuah nomawi lian an chawi leh tawh. Tunah hian match 30 chhung tlawm loin an kaltluang mek, inelna lian hmachhawn turin an inpeih tawh hle.

South America aṭangin - Argentina, Brazil, Ecuador leh Uruguay te chu World Cup khel turin an tling chiang tawh. Pangana Peru, Colombia leh Chile ten playoff khelhna hmun an la beisei; Nilaini zingah an dinhmun chinfel a ni ang.