Italy FA-in Mancini an thlawp

World Cup khel turin tling zo lo mah se Italian Football Federation (FIGC) chuan Roberto Mancini an thlawp, an manager hi ban loin a chunga rinna nghah chhunzawm an tum niin a lang.

Football ngaina ram ni chungin Italy hi a zawnin World Cup-ah an khel phak dawn lo. An hneh ngei tura ngaih an hneh hleithei lo a, playoff pawh anmahni ramah ngei khel mah se North Macedonia chu 1-0 in an ngam lo.

FIGC president Gabriele Gravina chuan, "Mancini hian a hna a thawh chhunzawm duh ngei ka beisei. Hmathlir thui tak kan nei a, chu kan thil tih tum chu chiang takin a hria, tunah hlawhtling nghal lo mah ila beidawng loa beih chhunzawm kan duh.

"Italian mite rilru natna hi thil tih hmanga thawi dam leh turin kan duh. Nikum nipui lai khan kan thil tum pakhat chu a hlawhtlimng tawh, chuvangin theihna a nei tih a chiang. Fakselna chu lo awm ve bawk mah se kan ring ngam," a ti.

Azzurri hi European champion ni chungin World Cup-ah an inlan phak lo. Italian mipui tam tak chuan coach an sawisel, football thuneitu lam erawhin Manchester City manager hlui an la thlawp tihna a ni.

Macedonia an hneh loh hnuah Mancini hian hmalam thlir a ngaih thu a sawi a, a hma hun erawh engmah a sawi chiang thei rih lo thung. Zanin dar 12:15 hian Italy-in friendly match-ah Turkey an hmachhawn ang.