Aizawl club hmaah Saitual club

GIG Motors 20th MFA Cup chu vawiin aṭangin Keifang Centenary Football Ground, Keifang, Saitual District-ah khelh ṭan a ni dawn. Chawhma dar 11:00-ah match hmasa berah Saitual FC leh Aizawl DFA aiawh Kanan FC te an inkhel ang.

Vawiin hian match thum khelh a ni dawn. Tlai dar 1:00-ah Mamit club Luangpawl FC leh Lawngtlai FC an inkhel ang a, tlai dar 3:00-ah Hnahthial club Electric FC leh Siaha FC te an intum bawk ang.

MFA Cup-ah hian district 11 aṭangin aiawh club pakhat ṭheuh an tel a, group paliah ṭhendarh niin a sang ber ṭheuhin semifinal an khel ang.

Football khawmpui
Covid-19 vangin kum hnih chhung football inelna lian tham a awm thei tawh lo a, MFA Cup awm tur hi football ngainatute tan chanchin lawmawm a ni. District hrang hranga football club ṭhaten Saitual-ah football khawmpui an nei dawn.

Tun hma chuan MFA Cup emaw district inelnaah Mizo mikhual thlenin an inthleng ṭhin a, player leh coaching staff-te in hrang hrangah an sem darh ṭhin a, tunah erawh school leh hotel-ah te an inkhuar thung.

Saitual FC manager Lalhming-hlua chuan, "MFA Cup kan thleng tur kan phur hle. Saitual DFA hnuaia zone hrang hrangah player kan zawng kual a, Keifang VC Hall-ah kan camp a, zing leh tlaiah kan training ṭhin. Inelna hmachhawn kan châk tawh hle," tiin Vanglaini a hrilh.

Team an ṭha
Hripui vangin MFA hnuaia DFA ten inelna an kalpui thei lo a, registration kalpui a nih loh avangin player-te hi free player vek an ni. Chumi awmzia chu tualchhung player-ten an duh club tan an khel thei a, club tan inpuahchahna neih ṭhat a pawimawh tluk zetin player ṭha lakluh thiam a pawimawh.

Hemi a nih avang hian Aizawl club tan chance a ṭha ber a, Aizawl DFA aiawh Kanan FC hi player fawm khawm ṭha ber tura ngaih a ni. Kanan FC coach hi Chawngthansanga a ni a, MPL club Reitlang FC leh Chanmari West FC te a enkawl tawh. Kanan FC hi Saitual FC hmaah fiahin an awm dawn.

MFA Cup vawi 20-na hi district hrang hranga football-a hma an sawn dan hriatna ṭha tak a ni dawn a, MPL club tan player zawnna remchang a ni ang.

Thlirna Tawi
Group A : Saitual FC (Saitual), Kanan FC (Aizawl), Saidan GSA (Kolasib)
Group B : Luangpawl FC (Mamit), Lawngtlai FC (Lawngtlai), FC Vengthlang North (Champhai)
Group C : Electric FC (Hnahthial), Siaha FC (Siaha), FC Serchhip Kawnpui (Serchhip)
Group D : Khawzawl FC (Khawzawl), Chanmari FC (Lunglei)

March 29, Thawhlehni
Grp A Saitual FC 11:00 AM Kanan FC
Grp B Luangpawl FC 1:00 PM Lawngtlai FC
Grp C Electric FC 3:00 PM Siaha FC
March 30, Nilaini
Grp D Khawzawl FC 9:00 AM Chanmari FC
Grp C FC Serchhip Kawnpui 11:00 AM Electric FC
Grp A Saidan GSA 1:00 PM Saitual FC
Grp B FC Vengthlang North 3:00 PM Luangpawl FC
March 31, Ningani
Grp C Siaha FC 9:00 AM FC Serchhip Kawnpui
Grp A Kanan FC 11:00 AM Saidan GSA
Grp B Lawngtlai 1:00 PM FC Vengthlang North
Grp D Chanmari FC 3:00 PM Khawzawl FC