World Cup-ah Poland nge Sweden?

Zanin dar 12:15 hian Poland-in World Cup Playoff final-ah Sweden an mikhual dawn. Poland-in hnehna an chang a nih chuan Qatar-ah tun dinhmuna khawvel striker ṭha ber Robert Lewandowski an hmu dawn tihna a ni a, Sweden an chak erawh chuan striker thawm nei lian Zlatan Ibrahimovic a inlan thung ang.

Silesian Stadium, Chorzów-a inkhel tur hi a pawimawh a, hming langsar an awm nuk avangin khawvel pawhin a ngaihven. Poland hi semifinal-ah Russia hmachhawn tur an ni a, amaherawhchu Russia hian Ukraine an run avangin an hmachhawn duh lo. FIFA leh UEFA-in Russia hi a hrem zui a, Poland-in semifinal khel loin final hi an lut.

Sweden erawhin Czech Republic an hmachhawn a, hun pangngaiah chak zawk an awm lo. Extra time-a Robin Quaison goal hmangin Czech hi an hneh hram a, a eng zawnga thlir chuan semifinal-ah hrem vangin Ibrahimovic a khel thei lo. AC Milan striker Ibra hian Poland a hmachhawn thei tawh ang.

Inkhelhna tur Silesian Stadium-ah hian entu 54,000 an leng a, ticket an hralh zo vek tawh. Poaland hi mahni muala khel tur ni mah se an khaw mipui ṭhahnem takin team ṭha zawkah an inngai lo. An record thlir chuan thilmak pawh a ni lo - Poland hian an match hnuhnung parukah Sweden hi an hneh lo.

Euro 2020 khan Poland hian Sweden hi 3-2 in an hneh lo a, tun ṭumah pawh hian an fimkhur khawp ang. Playoff semifinal an khelh theih loh avangin Scotland nen friendly match an khel a, 1-1 an inhnehtawk. Hemi ṭum hian Bayern Munich striker Lewandowski chu hahdamtir a ni.

Poland coach Czeslaw Michniewicz chuan, "Sweden hi kan zir uluk hle. Czech nena an inkhelh ṭum pawh khan kan aiawhten a hmunah an en. Team ṭha tak an ni a, khelh dan nghet an nei bawk. Chutichung chuan tum kan nei a, kan hlawhtlin ngei pawh kan ring," tiin a sawi.

Sweden coach Janne Andersson chuan, "Semifinal nen chuan a inang dawn tawh lo. Czech leh Poland khelh dan a inang lo a, chuvangin kan khelh dan pawh a hrang dawn. Hahdamna hun ṭha kan nei a, World Cup khelh ngei kan tum" tiin a sawi ve bawk.