Nets leh Lakers an chak lo

NBA regular season an khar hnai, chawlhkar hnih hnuah chuan playoff an khel tawh dawn. Dinhmun chiang loa ding mek Los Angeles Lakers leh Brooklyn Nets te chu nimin zing khan an khingpui lakah an tlawm ve ve.

Nets tan Kyrie Irving chu Barclays Center-ah a inlan, tun season chhungin anmahni muala a inkhelh vawi khatna a ni. Hripui leng inkaihhruaina vangin, invenna damdawi la lo tan New York-ah inkhelh a rem lo a, tun hnaiah a theih ve chauh a ni.

Irving inlan thei mah se Nets hi Charlotte Hornets lakah 119-110 in an chak lo. Steve Nash-a naute hi Eastern Conference table-ah pakuana an ni, an elpui leh playoff hmunruak an inchuhpui Hornets an hneh lo hi a la pawi thei dawn.

Inkhel dangah Los Angeles Lakers chu New Orleans Pelicans lakah 116-108 in an tlawm bawk. LeBron James awmna Lakers hi season kal laiah vawi 43 teh meuh an tlawm ta, playoff khelh phak a harsa tawh dawn.

Western Conference table-ah Lakers hi 10-na an ni a, pariatna chin chauhin playoff an khel dawn. Pariatna china awm Los Angeles Clippers aiin match ngain an chak tlem zawk, pariatna ni tur chuan thil mak a thlen a ngai tawh ang.

NBA - Nimin Results
Los Angeles Lakers 108 - 116 New Orleans Pelicans
Charlotte Hornets 119 - 110 Brooklyn Nets
Utah Jazz 100 - 110 Dallas Mavericks
New York Knicks 104 - 102 Detroit Pistons
Minnesita Timberwolves 112 - 134 Boston Celtics
Golden State Warriors 115 - 123 Washington Wizards
Philadelphia 76ers 104 - 114 Phoenix Suns