Ferrari car tlan pelin Verstappen a chak
Formula 1 champion lai Max Verstappen chuan Saudi Arabian Grand Prix-ah hnehna a chang, pakhatna ni tur hian vawi nga chauh tlan kual tur a awm tawh tihah Ferrari driver Charles Leclerc chu a tlanpel.
Pathianni zana car intlansiakna sang berah Verstappen leh Leclerc an inum tawk hle, intlansiak hmasa zawka hnehna changtu Leclerc hi a vannei nawn leh ngei dawn ni pawhin a lang hman a, a dinhmun pawh a ṭha.
Mahse, dawhthei taka hun remchang ngak hram hramtu Max-a chu a tawpah a inlar thung a, tun season bik atan a vawi khat nan a chak lo, point a hmuhna hmasa ber a ni nghal bawk.
Mercedes an la che fuh thei rih lo, 15-na aṭanga bul ṭantu Lewis Hamilton chu 10-naah a thleng hram. Hamilton tan Vertsappen chauh ni loin, team hlun Ferrari pawh elpui hautak an ni dawn tih a chiang.
Red Bull car khalhtu Verstappen hi 0.5 second lekin a thleng hmasa. Pathumnaah Ferrari driver Carlos Sainz thlengin, a hmasa ber aṭanga tlan ṭan Red Bull driver Sergio Perez chu palina a ni thung.
Boruak danglam
Hun rei tak chhung Hamilton leh Mercerdes-in F1 an thunun, season hmasa khan Red Bull car hmangin Max a inlar. Tun season intlansiak pahnih an neih tawh chinah chuan, Italian team Ferrari chuan nasa takin hma an sawn tih a lang.
Verstappen hi intlansiak hmasa zawkah khan car engine chiang lo vangin a tlan tluan thei lo, a teammate Perez pawhin result ṭha a nei lo, team lamin an insiamṭhat tur thu an sawi a, a takin kan hmu nghal.
Ferrari car leh Red Bull car an inum tawk hle a, a bik takin Verstappen-a'n Leclerc a um lai khan a car hnunglam a su teuh thei vet vet hle a, second khat lek pawh tih sual zeuh nei se inbakkaih theihna tur thil a awm.
Boruak san vanglaiin Max a huaisen a, season hmasa intlansiak hnuhnung bera Red Bull ruahmanna ṭha tak ang kha tun ṭumah pawh kan hmu leh, team leh driver inbeihna sang takah a chungnung ta a ni.
Vawi sarih champion tawh Hamilton tan awlsam taka nomawi lak a theih dawn loh. Britain star hian Michael Schumacher-a nen record inṭawm an neih lai kalsan a duh a nih chuan, intlansiak pathumna aṭangin point hmuh tam a ngai tawh ang.
A bul ṭanna
Hnehna changtu Verstappen-a'n point 25 a hmu a, driver championship-ah pathumna dinhmun a luah. Dutch tlangval chuan, "Kan tan chuan season bul a inṭan ve ta, point kan hmu ve thei hi ka lawm takzet.
"Tun ṭumah khan dawhtheihna pawimawhzia a takin kan hmu. A bik takin hnehna chan tum luat avanga hmanhmawh lutuk hian chetsualna a thleng thei, dawhthei taka kan nghah hian result a ṭha zawk ṭhin," a ti.
Saudi Arabia thlalera intlansiakah khan Verstappen hi lap 10 chauh tlan hmabakah pawh pahnihna a la ni a, a hmaa tlan Leclerc a chetsual duh loh avangin beiseina a hniam hman, a tawpah erawh a hlim zawk a ni ta tho.
Red Bull technical head Adrian Newey chuan, "Bahrain-ah khan kan hmu tawh a, tun ṭumah pawh kan hmu nawn. Driver pahnih ṭha tak kan nei a, champion turin theihna an nei ve ve," tiin an driver pahnih a chhuang hle.
Car intlansiakna sang ber hi chawlh kar hnih chhung an chawl dawn, chumi hnuah Australian Grand Pirx an tlan ang. Melbourne khawpuiah hian hripui vangin season hnih chhung chu inelna an nei thei lo, kuminah erawh an nei dawn.