World Cup khel turin Canada an tling

Nimin zing khan Canada-in Jamaica 4-0 in an sawp a, kum 36 hnuaa a vawi khat nan FIFA World Cup khel turin an tling. Confederation of North, Central American and Caribbean Association Football (CONCACAF) aṭangin team thum an tling nghal dawn a, team pakhatin playoff an khel bawk ang.

BMO Field, Toronto-a inkhelah Canada-in inkhel an thunun. Minute 13-na lekah Cyle Larin-a'n mualneitu tan goal hmahruai khungin Tajon Buchanan (44') leh Junior Hoilett (82') ten an khung belh a, Jamaica defender Adrian Mariappa-a'n minute 88-naah an lamah a tilut bawk.

Canada-in World Cup vawi hnih an khelhna tur chauh a ni a, kum 1986 khan a vawi khat nan khelin group stage-ah an tla. Tun ṭuma team enkawltu John Herdman hian hlawhtling takin Canada hmeichhe team a enkawl tawh a, 2012 leh 2016 khan Olympic-ah bronze medal a lakpui a ni.

Herdman-a hnuaiah mipa team pawhin hma an sawn a, nikum khan FIFA ranking-ah 72-na aṭangin 40-naah an invawrh chho. United States leh Mexico awmna aṭanga tling hmasa ber an ni thei hi a ropui hle. Herdman chuan, "Team ka enkawl tirh khan World Cup kan khelh tur thu ka sawi. Ka thusawi an awih loin ka hria. Tunah erawh kan hlawhtlinna avangin fan-te an lawm a, an nghah rei tawh em avangin an lawm a ni," tiin a sawi.