Australian Open sawn an tum lo

Tennis season kal lai la zo chiah lo mah se season thar hman dan tur ngaihtuah a ngai tawh. Janaury thla a khelh tur Australian Open 2021 chu a hun sawn tumna a awm lo niin Tennis Australia (TA) chuan an sawi.

Covid-19 vangin infiamna khawvel a buai a, tun season-ah pawh Wimbledon chu khelh theih a ni lo. French Open chu a khelh hun sawn niin, US Open chu a hun ngaiah a hmuna entu awm loin khelh a ni thung.

Season tharah pawh hri leng hi a la reh mai dawn lo, na takin nghawng a la nei ngei dawn. Grand Slam pali zinga an khelh hmasak ber ṭhin Australian Open hi buai hmasa tur chu an ni dawn.

TA thupuangtu chuan, "Inelna neihna tur hmuna sorkar thuneitu te nen inbiakna a kal mek, player zin lut khunghran leh kaihhruai dan tur pawh duan mek a ni. Tournament hun sawn tur anga sawi erawh thu leng vak mai a ni.

"Sorkar thuneitu, damdawi lam thiam leh coronavirus chungchanga hna thawktute pawh biak rawn an ni. Player, mipui leh hna thawktute hriselna chu kan ngaih pawimawh a ni a, chumi hre reng chung chuan inelna buatsaih tum a ni," tiin a sawi.