Juventus chakna Cristiano Ronaldo

Cristiano Ronaldo hming leh 'goal' chu sawi hran theih loh, thil inzawm tlat a ni. Portuguese forward chuai thei lo hian Cagliari lakah goal hnih khungin Juventus chu 2-0 in a chakpui.

Allianz Stadium, Turin khawpuia inkhelah Ronaldo-a'n minute 38 leh 42-naah goal a khung, manager thar Andrea Pirlo naute hian Serie A match riat khelh aṭanga point 16 hmuin pahnihna an ni - hmahruaitu AC Milan chuan match khata khel tlem chungin point 17 an nei thung.

Inrinni zan Serie A inkhelah hian player leh match official ten an biangah rawng sen an tat. Rawng sen an tah hi hmeichhe chunga tharum thawhna thleng ṭhin an duh loh zia lantirna a ni.

Goal khung thei an awm a, goal khung tur siamsak thei an awm bawk. Player tam tak zinga tlemte chauhin ball hlauhawm ni pawha lang lo goal atana chantir thei an awm, an zinga pakhat chu Ronaldo a ni.

Real Madrid forward hlui hian box hrula a ball chan chu rang takin a insiamrem pui a, an khingpui player pathum ngawtin bawr buai mah se rang taka pet thutin goal khatna a khung.

Chawlhlawk hma deuhin an goal hnihna a khung chhunzawm, corner aṭanga ball lo kal chu an tauh pial chhuak dawn niin a lang hman. Ronaldo-a'n ball hi a tlan pel hman niin lang mah se rang taka pet lui hramin goal hnihna leh chak nemnghehna a khung.

Hnehna changin point thum an hmu a, nomawi kawl lai humhim turin kawng dik an zawh. Juventus manager Pirlo erawhin a la duhtawk mai lo, ball chang hnem leh inkhel thunun tak chunga chak a duh.

Italian manager Pirlo chuan, "Player hi chu che reng leh danglam reng an ni a, kan club khelh dan phung erawh a pangngai reng ang. Hnehna changa point hmuh hi a ṭha, chutih rualin inkhel hmuhnawm chhawp chhuah hi kan tih ṭhin dan a ni.

"Ka naute khelh dan khan min ti lawm, chutih rualin hmasawnna tur chu kan la nei. Ram tana feh chhuak rawn haw khawm hlim an ni a, tun atan chuan lungawi a ngai," a ti. Ronaldo chu player ṭha chungchuang bik a nih zia a sawi tel bawk.

Inrinni zan Serie A inkhel dangah Lazio chuan Crotone 2-0 in an luhchhuah a, forward Ciro Immobile leh Joaquin Correa ten goal khat ve ve khungin an team an chakpui a, table-ah pasarihna dinhmun an luah lailawk.

Tun hnai season hnih chhung Champions League khel phak Atalanta erawhin beisei an phak lo, an mikhualna ramah Spezia nen goal awm loin an inhnehtawk - parukna niin season thara UCL khel phak tur chuan insiamṭhat ran a ngai.

Nizan khan league hma-hruaitu leh team hmuhnawm Napoli te an inhmachhawn a, result kan hre hman lo. Zlatan Ibrahimovic awmna Milan hi an chak a nih chuan an hmahruaina an sawhnghet ang, an chak lo a nih pawhin a chung berah an awm chhunzawm ang.