VAR puihnain Man United an chak

Old Trafford-ah Manchester United-in harsa takin Premier League kai thar West Brom 1-0 in an hneh. Ole Gunnar Solskjaer hote hian point thum hlawhchhuak turin VAR puihna an mamawh a, goal awmchhun hi penalty aṭanga Bruno Fernandes khung a ni.

Man United hian match riat aṭangin point 13 an hlawh chhuak a, a sang 10 zingah a tel tawh. Solskjaer hote hi match khata an khelh tlem avangin khelh zat inangah hei aia dinhmun sangah an la awm thei bawk.

First half-ah goal a lut lo a, second half-ah VAR a langsar. Minute 46-naah Conor Gallagher chu box chhungah Bruno Fernandes-a'n a ti tlu a, referee David Coote-a'n penalty a pe.

Amaherawhchu mual sira monitor a en hnuah Coote hian a thutlukna a thlak. United midfielder Fernandes hian Callagher a khawih fuh hmain ball a khawih fuh a, West Brom tan referee thutlukna hriatthiam a har ang.

Minute 53-naah United-in penalty an hmu ta thung a, Juan Mata ball pet chuan defender Darnell Furlong kut a fuh. Portuguese midfielder Bruno Fernandes rawn pen chhuakin United keeper hlui Sam Johnstone-a'n a dansak.

Replay hmanga en nawn a nih hnuah Johnstone-a'n line a pelh avangin pet ṭhat leh a ni a, Baggies keeper hian ring dik leh mah se Bruno penalty pet hi a dang nawn lo.

Manchester United-in tun season-ah a vawi khat nan Old Trafford-ah hnehna an chang a, result ṭha ni mah se an khelh danah erawh lawmna tur a tlem hle. Solskjaer hote hian tun season-a chak la nei lo leh player pawimawh captain Jake Livermore leh defender Kieran Gibbs tel loa khel Baggies hi an hneh hram.

Ole Gunnar Solskjaer chuan, "International break zawhah chak hi a hlu a, chutihrualin goal khat aia tam kan khung theih loh avangin hun tawp lamah kan hlauthawng tih a lang. David de Gea-a'n vawi hnih ṭha takin a dang a, kan hmabak erawh kan kutah a awm. Kan result ṭha hi kan chhunzawm zel thei a ni," tiin a sawi.

French midfielder Paul Pogba chu ram tana inkhelhnaah hliam tenau a neih avangin chhawr a ni lo a, Brazilian defender Alex Telles erawhin inkhel bul a ṭan thung.

United hian Thawhlehni zan dar 1:30 hian Champions League-ah Istanbul Basaksehir an hmachhawn ang.