Odisha leh Hyderabad an intawng dawn

Indian Super League-a Mizo kawl hnem ber Odisha FC chuan zanin dar 7:30 hian tun season atana an match hmasa ber an khel dawn a, Hyderabad FC nen an inkhel ang. 

Odisha hian Mizo player paruk an kawl mek a, season hmasaa Mizo player an neihsa, midfielder Jerry Mawihmingthanga, striker Daniel Lalhlimpuia leh midfielder Lalhrezuala Sailung-te an chelh thei a, pathum an lak belh bawk. 

Aizawl FC aṭangin midfielder Isak Vanlalruatfela leh Paul Ramfangzauva ten Odisha an pan a, ISL-a an season hmasa ber tur a ni. 

Shillong Lajong captain hlui, season hmasaa Kerala Blasters tana khel Samuel Lalmuanpuia chuan Odisha hi a zawm bawk a, Mizo player-in zaninah bul an ṭan vek erawh beisei chi a ni lo. 

Hyderabad pawh Mizo tamna tho a ni - age level-a India tana hming chher tak goalkeeper Lalbiakhlua Jongte chu Indian Arrows aṭangin an lalut a, R. Laldanmawia chu season hmasaa Hyderabad tana khel tawh a ni bawk. 

Season hmasa Hyderabad reserve team tana khel, midfielder Mark Zothanpuia chu senior team-ah sawn chhoh a ni a, FC Goa aṭangin Lalawmpuia an lalut bawk.  

Danmawia'n season hmasaah Hyderabad tan a khel tawh a, player pathum dangin zaninah Odisha an hmachhawn a nih chuan ISL-a an match hmasa ber tur a ni ang - Opa hi FC Goa-ah awm tawh mah se ISL-ah a la inlan lo. 

Odisha hi Scottish coach tawnhriat nei ṭha Stuart Baxter enkawlna hnuaiah an khel dawn a, Hyderabad hi Spanish coach Manuel Roca enkawlna hnuaiah an awm thung.