An mualah Villa chak lo

Premier League season bul ṭan fuh tak Aston Villa tan thil a awlsam vek bik lo. Inrinni zan khan Villa hi an mikhual Brighton & Hove Albion lakah 2-1 in an chak lo a, hmalam pan loin paruknaah an awm chhunzawm.

Villa Park a inkhelah Brighton tan striker Danny Welbeck chuan minute 12-na lekah goal hmahruai a khung a, tlarhnung phui vanga fak hlawh ṭhin Villa lamin English striker an veng hneh lo.

Mualneitu lamin chawlh-lawk hnuah defender Ezri Konsa hmangin sut mah se, mikhual team bawkin Solly March hmangin chakna goal an khung a, hun tawp dawnah Tariq Lamptey chu yellow card vawi hnihna hmuh vangin hnawhchhuah a ni.

Aston Villa lamin an si phurh sut theihna hun an neiah an inngai, March-a chuan penalty a chawi ngei niin lang mah se referee Michael Oliver-a'n VAR aṭanga a ennawn hnuah penalty a pe lo.

Dean Smith-a naute hi season tir lamah che ṭha viau mah se tun hnaiah an che fuh hlei thei lo, an muala an match hnuhnung pathumah Leeds United, Southampton leh Brighton an ngam lo vek.

Brighton lakah midfielder pawimawh Ross Barkley chu inkhel ṭan tir aṭanga minute hnihna lekah hliam vanga lak chhuah a ngai, English midfielder hi a malpui a hliam - a chawlh chen tur hriat a la ni lo.

Graham Potter enkawl Brighton lamin tun hnai thla hnih chhunga a vawi khat nan hnehna an chang ve chauh, 16-naah la awm mah se relegation zone aṭangin point rukin an la him.