PSG ngam loh Cesc Fabregas

Paris Saint-Germain chuan an duh angin ke chheh an la rem fuh tawk thei lo, tun season Ligue 1 match 11 an khelh aṭanga an vawi thum chak lohna turin AS Monaco 3-2 in an ngam lo.

French champion tan Kylian Mbappe-a'n goal hnih khungin a club hi 2-0 in hma a hruai pui, chak chiang tura ngaih an ni. Mahse, Monaco tan bench aṭanga lut Cesc Fabregas-a'n inkhel boruak thlak danglamin an si phurh sutna tur a siamsak bakah chakna goal penalty aṭangin a khung.

Chawlhlawk laiin Monaco lamin goal hnih an phur a, manager Niko Kovac-a'n danglamna thlen beiseiin Fabregas a luhtir. Spanish midfielder hi kum 33 mi a nih tawh avangin beisei san ngam a har.

Barcelona aṭanga inzir chhuak, Arsene Wenger-a'n a siam len Fabregas hian a thiam a lo la theihnghilh lo. Midfield lai aṭangin inkhel a thunun. Kevin Volland-a'n goal khat a sut hnuah, German winger Volland goal hnihna tur Fabregas-a'n a siamsak.

Fabregas hian a la duhtawk mai lo, hun tawp hma minute ruk a la awm tihah penalty aṭangin chakna goal a khung. 2017 champion Monaco hian point 20 hmuin pahnihna dinhmun an luah, an chungah point 24 nei PSG an awm.

Ligue 1 season bul ṭan nan Lens leh Marseille an ngam lo a, tunah an elpui Monaco lakah an chak lo. Season hmasa Champions League final lut thei hi, European football inelna sangah group stage paltlang lo thei dinhmunah an ding mek bawk.

PSG coach Thomas Tuchel chuan, "Goal hnih kan khung hmasa a, a dang pawh khung belh thei tur kan ni. Inkhel chawhnu lamah kan rilru kan pe tawk lo a, kan tuar ta a ni. Hamrik hnuhnung a rik hma chuan inkhel a la tawp lo tih hriat nawn a ngai," a ti.

Paris club dinhmun a ṭha lo, chutihrualin league hmahruaitu an la ni thei tho. Hliam vangin player chhawr theih loh an ngah a, a bik takin an thiampuipa Neymar inlan thei lo an tuar, tho chhuak turin theihna erawh an nei tih a chiang.