Nadal leh Djokovic an tla

Inrinni zan khan Rafael Nadal leh Novak Djokovic te chu ATP Finals khelh laiah final lut zo loin an tla, player ropui pahnih hi semifinal-ah an khingpui ve ve hneh zo loin an zinkawng a tawp.

Semifinal inkhel hmasa zawkah Djokovic leh Dominic Thiem an inhmachhawn, inkhel hmuhnawm leh inhnehtawk takah Austrian tlangvalin 7-5, 6-7 (10-12), 7-6 (7-5) in hnehna a chang.

US Open champion Thiem-a'n a service ṭha leh backhand ṭha tak a chhawr ṭangkai a, service a hloh miah lo. Set thumna tie break an neih laiin 4-0 ngawtin hniam hman mah se huaisen takin a ding chhuak ta zawk a ni.

Serbian star Djokovic chuan, "0-4 a hniam chunga a rawn thawh chhuah leh dan kha chu mak tak a ni, ka khel chhe hran lo chuan ka hria. Ka service pawh a vawi khatna a dik deuh zel, mahse harsa lo takin a lo vaw let thei zel a ni," tiin Thiem a fak.

Inkhel hnuhnung zawkah Daniil Medvedev chuan Nadal lakah 3-6, 7-6 (7-4), 6-3 in hnehna a chang. Russian tlangval hian tun hmain Nadal a la hneh ngai lo, tun season ATP Finals-ah erawh khel ṭha tluang ber ni chhunzawmin a la chak kim.

Grand Slam vawi 20 champion tawh Nadal chuan, "Chhuanlam siam tur a awm lo, ka hun ṭha neih chu ka bawhpelh a ni," a ti. Nadal hian nomawi tam tak chawi tawh mah se ATP Finals bikah tak hi chuan a la hlawhtling ngai lo.

Nizan khan Thiem leh Medvedev ten nomawi an inchuh zui nghal a, he thu buatsaih lai hian result kan hre hman lo. A thiam pariat inelnaah hian season hmasa khan Stefanos Tsitsipas a champion a, 2018 khan Alexander Zverev chuan nomawi a lo chawi tawh bawk.