Bundesliga record siamtu Moukoko

Borussia Dortmund-in Olym-piastadion Berlin-ah mual neitu Hertha Berlin 5-2 in an sawp a, Inrinni zan inkhelah hian Erling Haaland-a'n goal li a khung. Inkhelh banah erawh Haaland thlaktu Youssoufa Moukoko hming an sawi ri nasa thung.

Moukoko hi kum 16 leh ni khat mi lek a ni a, Bundesliga khel thei naupang ber record a siam. Cameroon-a piang Moukoko hian youth match 88 lekah goal 141 a khung. Heng zingah hian tun season Under 19 tana match li a khelhah goal 13 a khung a tel a, kumin August aṭangin senior team zingah training a nei ṭan a ni.

Erling Haaland chuan, "A bula khelh a châkawm hle. A kum rualpui ka nih laiin kei aiin a ṭha daih. Ka thlirnaah chuan tun dinhmuna talent nei ṭha ber a ni a, hmabak a nei êng hle. Kan zinga a tel hi kan vannei hle a ni," tiin Moukoko a fak.

Moukoko hi Cameroon-a piang ni mah se kum bithliah inelnaah Germany tan a inlan a, Bundesliga-a a chet ṭhat dan a zirin nakkuma khelh tur European Championship khelh theihna kawng a inhawng thei hial ang.

Dortmund hian tun din-hmunah player beiseiawm rual kum 17 mi Jude Bellingham, kum 18 mi Giovanni Reyna, kum 20 mi Jadon Sancho leh Haaland te an kawl a, nomawi an chawipui loh pawhin sum an hai luh hnem phah dawn.

Moukoko record sawi nasa mah se Haaland-a goal li erawh sawi zau a ṭul. Norwegian striker hian second half-ah vek a khung a, goal ṭha vek a ni bawk. 

Haaland chuan, "Goal khatna atana passing kha a ṭha a, goal hnihna pawh a mawi. Goal linaah khan ka offside emaw ka ti, engpawh chu ni se goal li kha a ṭha vek. Halftime-ah khan 'energy drink' ka in a, chakna min pe thar hle," tiin inkhelh banah a sawi.

Dortmund hero Haaland hi Italian chanchinbu Tuttosport- chuan Europe league sanga khel pha kum 21 leh a hnuai lam zinga player ṭha ber 'Golden Boy' ah an thlang. Norwegian forward Haaland hi  club tana a khelhpui Jadon Sancho, Bayern Munich wing back Alphonso Davies, Manchester United forward Mason Greenwood leh Barcelona fa chuam Ansu Fati ten an tluk lo.