MFA Cup-ah Saitual FC leh Aizawl champion inhnehtawk
Saitual FC-in an khawtualah result ṭha an hlawh chhuak a, nimin khan GIG Motors 20th MFA Cup opening match-ah Aizawl champion Kanan FC nen 1-1 in an inhnehtawk.
Inkhel dangah Mamit club Luangpawl FC tan substitute Malsawmzela'n minute 59-naah goal awmchhun a khung a, Lawngtlai FC 1-0 in an hneh.
Nimin khan inelna neihna hmun Keifang Centenary Football Ground bula cheng Keifang Venghlun VCP Biakzauva vuina neih a nih avangin match hnuhnung bera khelh tur Hnahthial club Electric FC leh Siaha FC te inkhelh hun sawn a ni a, April 1, Zirtawpni zing dar 7:00-ah khelh a ni ang.
Aizawl champion
MFA Cup-ah hian district aiawh team-te an inel a, Aizawl DFA aiawha kal Kanan FC hi Aizawl champion an ni. Chutihrualin Kanan FC-in nomawi an chawi ṭum hi Covid-19 hrilen hma a ni a, October 2019 khan Aizawl FC Jr hnehin ADFA First Division-ah an champion.
Kanan FC hneh Aizawl FC Jr hi MFA Cup champion lai an ni thung. April 23- May 3, 2019 khan Lawngtlaiah MFA Cup vawi 19-na neih a ni a, Aizawl FC Jr hian final-ah Lunglei DFA aiawh Zotlang FC an hneh.
Kanan FC-in champion nomawi Aizawla hawn leh ngei tumin tualchhung player ṭha an la khawm a, Mizoram senior leh junior team aiawha inlan tawh player deuh vek an ni. Goal nawr turin Vanlalthanga, Lalhriatpuia, David Laltlansanga, K. Roluahpuia leh Malsawmdawnga te an kawl a, player en chuan champion rinkai an ni.
Saitual an ni tlat
Saitual FC hi player ṭha rual awmna Kanan FC hmaah an zam lo a, tlarhnung tihphui ngai pawimawh hmasain an hun ṭha neih hman ṭangkai an tum.
First half tawp hma chiahin Kanan keeper RS Lawmzuala pet fuh tawk loh chu Zothanpuia zawnah a tla fuh a, Saitual midfielder hian goal-ah pet nghalin 'goal ṭha bik' a khung.
Kanan FC-in first half ang thoin inkhel an thunun zui a, goal hmaah an vannei tawk lo. K. Roluahpuia'n keeper chauh a hmachhawn hnuah goal a khung thei lo a, amaherawhchu ball-in Saitual FC player kut a per avangin Kanan FC-in penalty an hmu a, Vanlalthanga'n, minute 74-naah si phurh a sût.
1-1 a nih hnuah minute 15 la khel zui mah se a goal belh tawh lo.
Inkhel hnuhnung zawkah Mamit aiawh Luangpawl-in semi final luh theihna dinhmun tiṭhain Lawngtlai FC an hneh a; Champhai aiawh FC Vengthlang North an la hmachhawn leh ve ve ang.
Match pali
Vawiin hian group pali aṭangin inkhel pali a awm dawn. Khawzawl FC leh Lunglei aiawh Chanmari FC te zing dar 9:00-ah an inkhel dawn a, group D-ah hian team pahnih chauh an awm avangin ṭum hnih an inkhel tawn ang.
Group C vawiin hian an inlan ṭan dawn a, chawhma dar 11:00-ah FC Serchhip Kawnpui leh Electric FC, Hnahthial te an inkhel ang.
Chawhnu dar 1:00-ah Saidan GSA leh Saitual FC te an inkhel dawn a, Saitual tan group match hnuhnung ber a nih avangin semifinal beiseina chhi nung turin chak ngei a ṭul dawn.
Tlai dar 3:00-ah FC Vengthlang North leh Luangpawl FC te an inkhel dawn a, nimina chak tawh Luangpawl hi an chak leh chuan semifinal an lut ang. Vengthlang North-in point an hmu thung a nih chuan semifinal lut tur hre turin match hnuhnung ber nghal a ṭul ang.
Hripui leng avangin MFA Cup hi a rang thei anga zawh tura ruahman a ni a, kum dang aiin inkhel pawh a zing deuh a, an khel zawn deuh a ni.
Thlirna Tawi
Group A : Saitual FC (Saitual), Kanan FC (Aizawl), Saidan GSA (Kolasib)
Group B : Luangpawl FC (Mamit), Lawngtlai FC (Lawngtlai), FC Vengthlang North (Champhai)
Group C : Electric FC (Hnahthial), Siaha FC (Siaha), FC Serchhip Kawnpui (Serchhip)
Group D : Khawzawl FC (Khawzawl), Chanmari FC (Lunglei)
March 29, Thawhlehni
Grp A Saitual FC 1 - 1 Kanan FC
SAI : Zothanpuia 45'
KFC : Vanlalthanga 74' (P)
Grp B Luangpawl FC 1 - 0 Lawngtlai FC
LUA : Malsawmzela 59'
March 30, Nilaini
Grp D Khawzawl FC 9:00 AM Chanmari FC
Grp C FC Serchhip Kawnpui 11:00 AM Electric FC
Grp A Saidan GSA 1:00 PM Saitual FC
Grp B FC Vengthlang North 3:00 PM Luangpawl FC
March 31, Ningani
Grp C Siaha FC 9:00 AM FC Serchhip Kawnpui
Grp A Kanan FC 11:00 AM Saidan GSA
Grp B Lawngtlai 1:00 PM FC Vengthlang North
Grp D Chanmari FC 3:00 PM Khawzawl FC
April 1, Zirtawpni
Grp C Electric FC 7:00 AM Siaha FC