Canada hnung zui tur USA leh Mexico
Confederation of North, Central American and Caribbean Association Football (CONCACAF) aṭangin FIFA World Cup khel turin Canada an tling tawh a, United States leh Mexico ten hmunruak pahnih an luah khat a rinawm. CONCACAF aṭanga World Cup khel tur hi March 31, Ningani zing hian a hriat ang.
Canada-in match hnuhnung berah Panama an tlawh dawn a, tling chiang tawh mah se pakhatna dinhmun hauh turin point an la mamawh. United States-in palina Costa Rica an tlawh dawn a, Mexico-in El Salvador an mikhual ang. Inkhel hmabak hi a ruala khelh tur a ni a, March 31, Ningani zing dar 6:35-a khelh tur a ni.
A chiang?
CONCACAF-in World Cup-ah quota pathum an nei a, playoff hmangin pakhat an la tling thei bawk. Canada-in pakhatna dinhmun la luah lo mah se pathumna china an awm chian tawh avangin an tling tawh. Pahnihna United States leh pathumna Mexico te chhiarkawp danin an la tling lo nachungin World Cup an khelh ngei a rinawm.
FIFA hnuaia inelnaah hian point zawhah goal difference dah pawimawh a ni a, goal difference zawhah goal khung tam zawng niin chumi zawhah chuan head to head hman a ni chauh. Hemi a nih avang hian US leh Mexico te dinhmun hi a ṭha.
US hian palinaa awm Costa Rica an hmachhawn dawn a, team pahnih inkarah point thum a awm. Costa Rica hi chak pawh ni se US point hmuh zat an hmu pha dawn chauh a, tuna an goal difference inthlauhna hi goal 10 ngawt a ni.
Costa Rica tan goal ruk chuanga US hneh tur chuan thilmak a thlen a ṭul a, an chung chiaha awm Mexico pawh US nen an point hmuh zat a inan bakah an goal difference a ṭha tel bawk. Los Ticos (Costa Rica sawina) tan tlin nghal beisei ngam chi a ni lo.
Kawng a la inhawng
CONCACAF-a team hrang hrang dinhmun uluk taka thlirin US leh Mexico ten Canada hnung an zui ngei dawn. Chutihrualin Costa Rica tan Qatar zin theihna kawng a la inhawng.
Los Ticos hi a chhe berah palina an ni chiang tawh a, inter continental playoff hmangin World Cup an khel thei ang. Playoff hi June thlaah khelh a ni dawn a, Oceania champion an hmachhawn ang.
Zanin dar 10:30 hian OFC final-ah Solomon Islands leh New Zealand te an inkhel dawn a, heta chak zawk hian CONCACAF palina an hmachhawn ang. Oceania hian anmahni pualin World Cup-ah quota an nei lo.