Match 14 chak zawn Swiatek

World number 1 thar tur Iga Swiatek a kaltluang. Poland nula hian nimin zing khan American Gauff chu 6-3, 6-1 in a sawp a, harsatna nei loin Miami Open quarterfinal a lut.

Kum 20 mi Swiatek hian kar hmasa lawk khan Indian Wells title a la, tun hnaiah number 1 ni lai Ashleigh Barty a chawlh thut avangin ranking chhuak tharah pakhatna a ni dawn, a boruak a fuh chho hle.

French Open champion hlui Swiatek hian a match lehpekah chuan Petra Kvitova a hmachhawn leh ang. Czech Republic nula Kvitova hian inelna neih laiah match thum khel tawhin set khat chauh a la hloh, a khelh ṭhat lai ve tho a ni.

Inkhel dangah Naomi Osaka pawh a chak. Japanese nula hian quarterfinal lut turin American player Alison Riske chu 6-3, 6-4 in a hneh. World number 1 hlui hian Ons Jabeur hnehtu Danielle Collins a hmachhawn leh ang.

Grand Slam vawi li champion tawh Osaka chuan, "Nikum khan hun harsa ka tawh hnuah ṭha takin Miami Open ka khel, kuminah pawh hun hlimawm tak ka hman theihna hmun a nih avangin ka lawm," tiin a sawi.

Osaka hi player ṭha bik a ni, mahse rilru lam harsatna a neih avangin tun hnaiah a nih tur ang a ni phak lo. World ranking-ah pawh 78-naah a tlak hniam avangin, tun ṭumah hian seeded pawh a ni phak lo.