India hmeichhe team an inlan dawn

Bahrain leh Belarus lakah Indian football team an mualpho zo chauh a, hmeichhe team lam chuan April-ah international friendly match pahnih an khelh tur thu an puang ve leh ta.

India hmeichhe team hian Egypt leh Jordan an hmachhawn dawn a, April 5-ah Egypt nen inkhelin, April 8-ah Jordan nen an inhmachhawn ang - All India Football Federation (AIFF) chuan friendly match pahnih hi Jordan-ah ve ve khelh a nih tur thu an sawi.

March 28 aṭang khan India hmeichhe team hian Goa-ah training camp an nei tawh a, India tana inlan tur hian player 30 koh an ni - coach Thomas Dennerby hi Swedish mi niin, Sweden hmeichhe team leh Nigeria hmeichhe team pawh a lo enkawl tawh.

Kum 62 mi coach hian March 25 khan South Asian Football Federation U-18 Women's Championship-ah India U18 chu a champion pui a, Bangladesh leh Nepal te nen inelna hi hmachhawnin, vawi hnih ṭheuh an inkhelh kual vek hnua point hmu sang ber India hi an champion.

India hian Nepal chu vawi hnih an hmachhawnah 7-0 leh 5-1 in an sawp a, Bangladesh hi an intawn hmasa zawkah 1-0 in hneh mah se an intawn hnuhnung zawkah 1-0 in an ngam lo a, an point hmuh zat a inang - mahse, a tawpah goal difference-a chungnung zawk India an champion.

Dennerby hian SAFF U18 champion nomawi chawi aṭangin Astam Oraon, Apurna Narzary leh Martina Thokchom chu senior team-ah hian a ko a ni.

April 15 aṭang khian Hero Indian Women’s League chu Bhubaneswar, Odisha-ah khelh ṭan a ni dawn a, Jordan aṭanga an lo kir hunah Indian footballer-te hian an club ṭheuh an zawm zui ang.

India Squad
Goalkeepers: Aditi Chauhan, Linthoingambi Devi, Shreya Hooda, Sowmiya Narayanasamy.
Defenders: Dalima Chhibber, Sweety Devi, Ritu Rani, Ashalata Devi, Ranjana Chanu, Manisa Panna, Astam Oraon, Kritina Devi.
Midfielders: Anju Tamang, Sandhiya Ranganathan, Karthika Angamuthu, Ratanbala Devi, Priyangka Devi, Kashmina, Indumathi Kathiresan, Sanju, Martina Thokchom, Sumithra Kamaraj.
Forwards: Apurna Narzary, Grace Dangmei, Soumya Guguloth, Manisha, Pyari Xaxa, Renu, Karishma Shirvoikar, Mariyammal Balamurugan.

April 5, Thawhlehni Zan
 India vs Egypt

April 8, Zirtawpni Zan
 Jordan vs India