Owen Coyle-a'n Indian football a thlah

Ropui taka Jamshedpur FC a kaihhruai hnu lawkah Owen Coyle chuan Indian football a mangṭha ta a, Scottish coach hian an ram club Queen's Park FC chu coach ni turin a zawm.

Jamshedpur FC chief executive officer Mukul Choudhari chuan Owen hi an hnena cham turin a thlem a, mahse, Owen hian an ram lama hun hman a duh ve tawh avangin Scottish League One club Queen's Park sawmna hi a pawm ta zawk a ni.

Queen's Park chief executive Leeann Dempster chuan, "Jamshedpur FC chungah lawmthu kan sawi a, kan inbiak chhung zawngin harsatna min siam lo. Anni nena kan inbiakremna a zarah, Owen hian official takin June 1 aṭang bakin hna thawk dawn lo mah se, team a puih a rem dawn a ni," a ti.

Coyle chuan, "ISL-a ka hun hman kha nuam ka ti em em a, mahse, mahni in lama haw hi a hun ve tawhah ka ngai a, club hmathlir thui tak nei Queen's Park ka zawm thei hi ka lawm hle a ni. Club hmachhawpte hian min tiphur a, an ruahmannate hi ka tan chuan hnar phal chi a ni lo," tiin a sawi.

Queen's Park hi Scottish third division club chauh ni mah se, tun hnaiah hmasawn tumin an che na hle a, Dutch Eredivisie club AZ Alkmaar aṭangin season ṭan dawn khan director of football operations Marijn Beuker chu an thlem lut hial.

Kum 55 mi Coyle hian December 2019 khan Chennaiyin zawmin, ISL mawngphah lama awm chu final a hruai thleng a, August 2020 khan Jamshedpur zawm zuiin, Men of Steel-ah hian season hnih hun a hmang a ni.

Coyle hi Mizo player-te duhsaktu a ni a, Chennaiyin a enkawl laiin Jerry Lalrinzuala, Lallianzuala Chhangte leh Laldinliana Renthlei te a lo enkawl tawh a, Jamshedpur-ah Ricky Lallawmawma, Dinliana, PC Laldinpuia, Isaac Vanmalsawma leh William Lalnunfela te a lo enkawl tawh bawk.