Bamford-a tan season a tawp?

Leeds United forward Patrick Bamford chu a ke phah hliam avangin tun season chhung a inlan thei tawh lo mai thei a, Premier League club chuan an player chuan a ke phah ruh inzawmna lai a tihnat thu sawiin, zai erawh a ni dawn lo tih an sawi.

Club doctor Rob Price chuan Bamford chuan a ke phah hliam chu thla 12 zet a lo tawrh tawh thu a sawi a, tuna a rawn chhuah leh takah chuan a tlem berah kar ruk tal chawlh mamawh tura ngaih a ni.

Price chuan, "Uluk taka enkawl a, rei tak a dam theih nana kan bei chungin a hliam hian dam lam a pan thei rih lo a ni," a ti a, a tira hliam tenau anga lang chu a serious thu a sawi.

Premier League-ah kar riat chiah inkhelh tur a awm tawh a, Bamford hi kar ruk tal a la chawl dawn a nih chuan Leeds jersey haa rawn kir leh tur chuan, tun season atan beisei loh a fuh zawk mai thei.

Season hmasaa Premier League match 38 a khelh aṭanga goal 17 khung thei Bamford tan tun season hi theihnghilh tlak a ni - September khan a ke rekah hliam a tuar a, December khan rawn kir ve lehin, Brentford nen 2-2 a an inhnehtawkna inkhelah goal a khung nghal.

Mahse, March 13 khan 3-2 a Wolver-hampton Wanderers an hnehna inkhelah Bamford a inhliam leh a, minute 23-na lekah lakchhuah a ngai.

Kum 28 mi striker hian tun season-ah Leeds tan inelna hrang hrangah match 10 chiah khelin goal hnih a khung a, Leeds hi Premier League table-ah 16-na ni mekin, relegation battle an hmachhawn mek bawk.

Bamford-a chanchin avangin Leeds hnual mahse, chanchin lawmawm erawh an nei ve tho a, hliam vanga rei tak an chawlh hnuah captain Liam Cooper, centre back Diego Llorente leh midfielder Kalvin Phillips te chuan club training an zawm leh tawh.

April 2, zan dar 7:30 hian Leeds United hian Premier League match khel turin Southampton an mikhual dawn a, player pathum hi inlan vek thei tawh tura beisei an ni.