Sportswoman of the Year tan Mirabai Chanu

Weightlifter Mirabai Chanu chu BBC Indian Sportswoman of the Year 2021 atan an thlang. Award hi British media lian leh rintlak BBC buatsaih a ni a, chawimawina dawng tur hi mipui vote hmanga thlan a ni.

Manipuri nula Chanu-i hian Tokyo Olympic-ah khan 49kg category-ah silver medal a la, Indian weightlifter zinga Olympic huanga medal la thei hmasa ber a ni a, a sulhnu hi sawi nep theih a ni lo.

Chawimawina dawng tur hian golfer Aditi Ashok, boxer Lovlina Borgohain, para-shooter Avani Lekhara leh badminton player PV Sindhu te a khum a, a khumte hming pawh a hrawl hlawm viau.

Kum 27 mi Chanu chuan, "BBC Indian Sportswoman of the Year award min pe hi ka lawm, ka tan chuan chawimawina sang leh hlu bik a ni. BBC India chungah ka lawm takzet," tiin a sawi.

4ft 11in leka sang Mirabai Chanu hi tunah chuan United States-ah a training mek a, kumin chhunga neih tur Asian Games leh Commonwealth Games atan inbuatsaihna a nei mek, ram tan medal hlawhchhuah ngei a tum thu a sawi bawk.