Chhunga'n Aizawl FC a chakpui

I League khel mekah Aizawl FC-in point thum hlu tak a hlawh chhuak a, Thawhṭanni zan khan Ramhlunchhunga goal mawi hmangin Kenkre 1-0 in an hneh. Inkhel dangah Chuchill Brothers leh Sreenidi Deccan te 1-1 in an inhnehtawk a, Neroca-in Indian Arrows 1-0 in an hneh bawk.

Kalyani Stadium, Kolkata-a inkhelah Aizawl FC-in inkhel an thunun a, goal hmaah an vannei tawk lo. Samuel Lalmuanpuia'n a chance ṭha neih hmasak a khung thei lo a, Aser Pierrick Dipanda pawhin goal zawnah a pet thei bik lo.

Second half minute 63-naah F. Lalremsanga aiah Ramhlunchhunga a rawn lut a, Mizo tlangval ball thiam hi danglamna thlentu a ni zui. Minute 75-naah Samuel-a'n freekick pet ṭha tawk lo mah se Kenkre-in ball an clear thei lo a, Dipanda Dicka-a'n fing takin Chhunga tan a siam a, Kolasib tlangval hian kawh zetin a pet goal.

Mizo club-in goal an khung hnuah pawh inkhel an thunun a, chak an phu. Aizawl FC hian April 1, Zirtawpni tlai dar 5:30-ah Gokulam Kerala nen an inkhel dawn a, an khingpui tur hi table chung lama awm club an nih avangin fiahna ṭha tak a ni thei ang.

March 28, Thawhṭanni
Neroca 1 - 0 Indian Arrows
NER : Brijesh Giri 73' (OG)
Aizawl FC 1 - 0 Kenkre
AFC : Ramhlunchhunga 75'
Sreenidi Deccan 1 - 1 Chuchill Brothers
SRE : Vineeth Kumar Velmurugan 16'
CHU : Komron Tursunov 62'
March 29, Thawhlehni
Real Kashmir 2 - 2 Sudeva Delhi
RKA : Tiago Adan 3', 39'
SUD : Gopalan 51'; Seilenthang Lotjem 90+1'