Hmalam panin Medvedev a kal zel

Daniil Medvedev chuan world number 1 nih leh ngei a tum a, hmalam panin a kal zel. Number 1 dinhmun luah leh tur chuan match hnih a chak leh phawt a ngai dawn, awlsam taka hlen chhuah ngawt theih chu a ni dawn lo.

Nimin zinga Miami Open inkhelah, seeded pakhatna Medvedev hian Pedro Martinez chu 6-3, 6-4 in a hneh. A match hmasa zawkah Andy Murray chu awlsam takin a lo hneh tawh bawk, match hnih a khelh tawh chinah a chak nuamsa thei hle.

Russian tlangval hian Miami Open semifinal a thleng phak a nih chuan, number 1 ni lai Novak Djokovic a nek chhuak leh dawn. Martinez lakah hian vawi 14 ngawt aces a siam a, darkar khat leh minute 24 an inkhelh chhungin a khingpui service vawi thum a chhuhsak.

Kum 26 mi Medvedev chuan, "Kan inkhelhna hmunah hian ball kal a chak lutuk lo, chuvangin a bik takin Spanish player hmachhawn an awlsam lo. Point hmuh tumin rei tak tak kan in nawr tawn chang a awm, a tawpah chuan tihsual neih tlem ṭangkaina ka hmu," a ti.

Last 16-ah chuan Jenson Brooksby a hmachhawn leh ang. American world number 39 hian inkhel dangah Spanish player tho Roberto Bautista Agut a lo hneh ve bawk. Miami Open semifinal la lut ngai lo Medvedev tan fimkhur a ngai ang.

Mipa singles inkhel dangah Stefanos Tsitsipas chuan Alex de Minaur 6-4, 6-3 in a hneh a, seeded pathumna hian Marin Cilic hnehtu Carlos Alcaraz a hmachhawn leh dawn; US Open champion hlui Cilic hi 6-4, 6-4 in a chak lo a ni.

Kar hmasa lawka hlawhtlinna chang, Indian Wells champion hlim Taylor Fritz pawhin amah ang bawka American player Tommy Paul 7-6 (2), 6-4 in a hneh. Serbian star Serbian Miomir Kecmanovic-a'n 7-6 (4), 6-3 Sebastian Korda in a hneh ve bawk.