Barcelona-in player langsar kan hip - Joan Laporta, Barca president

Barcelona president Joan Laporta chuan player langsar an hip thu a sawi a, Nou Camp-ah Atletico Madrid forward Joao Felix lakluh a duh thu a sawi lang bawk.

Laporta-a'n president hna a chelh leh hnuah Lionel Messi chelh thei lo mah se manager atana Xavi an rawih hnuah nasa takin hma an sawn.

Player langsar
Barca president Laporta chuan, "Haaland leh Mbappe te Barca nen an sawizawm maw? Player pahnih lalut tura sum ngai zat min hrilh khan keini chuan kan pawm thei lo. Tun dinhmunah chuan Barca tana an khelh a beiseiawm loh hle," tiin an sum dinhmun ṭhat loh vanga sum ṭhahnem tak an sen theih loh thu a sawi.

Catalan club hian an sum dinhmun chhiat vangin Lionel Messi an chan a, an player lakte pawh free transfer deuh zel niin an player neihsate hlawh an ti hniam bawk.

Amaherawhchu Barca hian Pierre-Emerick Aubameyang, Ferran Torres leh Adama Traore te hlawh tlem zawkin an lalut thei a, player langsar an hip tih a chiang. Tunah pawh Robert Lewandowski leh Mohamed Salah te nen sawizawm an ni.

Lewy leh Salah te chungchang zawhna chhangin Laporta chuan, "Player ṭha ber ber ho hian Barca zawm an duh. Amaherawhchu Lewy emaw Salah emaw nen kan inbia tih erawh ka sawi a rem lo. Thil awm dan zawng zawng ka sawi chuan inbiaknaah buaina a awm thei," tiin a sawi a, player langsar biak an nei niin a lang.

Engtin zel?
Barca hian team tana ṭangkai tur player lakluh theih tur chu an nei a, Leeds United winger Raphinha nen sawizawm an ni mek. Laporta chuan, "Raphina hi ka player duh zawng tak a ni a, agent atan Deco a hmang. Chiang taka ka sawi duh chu Deco hi hlawh kan pe dawn lo a, min pui ringawt dawn," tiin Raphinha lakluh an tum thu a sawi.

Raphinha agent Deco hi Chelsea leh Barcelona midfielder hlui kha a ni a, Catalan club vanneihna a ni thei ang. Khawthlang media chuan Barca leh Raphinha te hian inremna an nei tawh angin an ziak. Barca hian Wolves aṭanga an hawh Adama Traore chu lak ngheh an tum a, loan hmanga English club tana khel mek Francisco Trincao nen inthleng an duh.

Portuguese forward Joao Felix pawh Barca enthlak zingah a tel. Laporta chuan, "Joao Felix hi ka duh takzet. Nipui bazar khan Griezmann nen inthleng kan tum a, kan hlawhchham. Felix ka ngainat thu ka sawi avang hian Atletico an thinur loh ngei ka beisei," tiin a sawi.

Barca president Laporta hian nipui bazar atan player pahnih an biak rem tawh thu a sawi a, midfielder leh centre back an nih thu a sawi lang bawk. Laporta hian an hming sawi lang lo mah se Franck Kessie leh Andreas Christensen te ni tura ngaih a ni. Chelsea player dang Cesar Azpilicueta pawh Barca nen an sawizawm.