Van Gaal-a'n Ten Hag thurawn a pe

Netherlands coach hlui Louis van Gaal chuan Ajax manager Erik ten Hag chu Manchester United zawm lo turin thurawn a pe a, English club hi football aia sum lama hlawkna umah a puh.

Van Gaal chuan, "Erik hi a hranpain thurawn ka pe dawn lo a, a ṭul a nih chuan min rawn be mai rawh se. Sum lama hlawkna um club ni loin football club thlang turin ka duh," tiin a sawi. Kum 52 mi Ten Hag hian Dutch champion Ajax tan kum 2023 thleng contract a nei a, Man United manager lailawk Ralf Rangnick thlak tur zingah sawi rik a ni.

Ten Hag bakah hian Paris St-Germain boss Mauricio Pochettino, Sevilla coach Julen Lopetegui leh Spain coach Luis Enrique te hming a ri tel. Van Gaal chuan sawi chhunzawmin, "Erik ten Hag hi coach ṭha tak a ni a, Manchester United tan chuan a ṭha dawn. Chutihrualin Manchester United hi hlawkna um club an ni a, coach tan thutlukna siam a harsa dawn. Football club thlang tur chuan ka duh," tiin a sawi.

Kum 70 mi Van Gaal hian kum 2014-2016 inkar khan Manchester United hi a enkawl a, FA Cup a champion pui zawhah an ban.