Italy: Engvanga World Cup khel lo tur nge an nih?
July, 2021 chauh kha a la ni a, a la rei lo - Italy chuan Euro 2020 final-ah penalty hmangin England an hneh a, European champion an nih kha. "Fak lo tu nge awm thei ang?" tih hla ang maiin Italy faknain kil tin a luah a, a hmun lailum changtu chu Roberto Mancini a ni.
March, 2022 a her chhuak a, Italy coach chu Roberto Mancini tho a la ni a, thawnthu erawh a danglam ta. European champion Italy chuan ram tenau North Macedonia an ngam lo a, World Cup an khel dawn lo!
March 30, 2022-a i thu chhiar hi mak i ti a ni tiraw? Hmanni lawka Europe ngamtuin World Cup an inpetkai zo lo hi mak i ti a nih pawhin i demawm loh e, khawvelin mak a ti tlat a, football khawvelin ui takin a thlir a nih hi.
Football journalist tam takin a chhan an zawng a, football expert-ten Italy-a thil fel lo awm hriat an duh - tu chu nge puh tur ni ang a, tuin nge mawhphurhna chu la ta ang?
Disastro
North Macedonia-in playoff aṭangin Italy an pet chhuak a, Italian player-te an bawk thlawp a, fan-ten an mittui an dang zo lo. Playoff an khelh dawna, "World Cup kan khel ang," titu Mancini pawh hrilhhai takin a hawi vel a, football nunrawnna chuan Italy a lukhung ta si.
A tuk khua a lo var a, Italian media-te insum an tum lo - player duhkhawp lohna, Mancini sawiselna, Italian FA thlenga demna a inziak kur ngiai nguai a, Italy-ah chuan titi dang a leng meuh lo. A awm lo hran lo e, World Cup an khel dawn lo tlat alawm.
Italy defender chhuanvawt Giorgio Chiellini chuan, "Nghaisak leh tihchhiat vek kan ni," tiin a sawi hial a, North Macedonia laka 1-0 a an tlawmna chu Italy tan chhiatna tawpkhawkah a ngai.
Italian infiamna chanchinbu lar zual bik pathum, Gazzetta dello Sport, Corriere dello Sport leh Tuttosport te chuan thupui inang ṭheuh an hmang a, "Disastro" tih chu lianpuiin an ziak - chu chu "Chhiatna" tihna a ni.
Beiseina petu
World Cup 2018 khel tura Italy an tlin zawh loh khan media leh fan ten mawhpuh tur an lo zawng ruai tawh a, World Cup 2006 an champion ṭuma player pawimawh Gianluigi Buffon leh Daniele de Rossi ten ram tana inkhelh an chawlhsan zui.
Italy tan tih tur hmasa ber a chiang nghal - chu chu coach thar lak a ni a, tawnhriat nei ṭha Mancini an lalut zui. Italian coach hi an ram football fans tan beiseina siamtu a ni.
Inter Milan leh Manchester City tan pawha league nomawi lo chawi tawh, player a nih laia a luhlul em avanga hriat hlawh kha a ni a, Mancini-a'n Italy a enkawl rualin thawm a nei nghal a, ring tak a ni.
Kum thum chhung chu Italy-in football ram ropui an ni tih an pholang a, an team tluchhe mek chu an dinthar a, Mancini hoin an nui leh ta - an lawmna tifamkim turin Europe champion an ni hial a!
Mahse...
European champion nomawi a la rang hman lo a, an medal dawnte pawh a awrhna hrui a la bal hman lo - team indinthar anga kan hriat Italy kha North Macedonia-in an vel a, sawi nawn leh a ngai ṭhin - World Cup an khel dawn lo!
Mancini-a'n European champion an nih avanga chawimawina parṭhi awrh a duh a nih chuan World Cup an khelh dawn loh avanga chirh thehna chu a dawngsawng ngam tur a ni a, mipui a hnungchhawn thiang lo.
UEFA hnuaia World Cup qualifier-ah Italy hi group C-ah dah an ni a, Switzerland, Northern Ireland, Bulgaria leh Lithuania te nen an awm ho a, Azzurri (Italy sawina) tan tlang mai theihna tur group niin a lang.
Group C-a deh khirh ber tura lang Switzerland pawh hi Italy nena khaikhin a ralah chuan naupang kal zir ṭantir ang chauh an la ni a, an inthlau lutuk - group hmahruaitu nia chunga World Cup khelh phak chu Italy tan chuan 'bel chhung sa' ang hlauh a ni.
Football nunrawng!
Beisei lawk ang ngeiin Italy-in bul an ṭan ṭha - match hmasa pathumah an chak nghal vek a, Northern Ireland, Bulgaria leh Lithuania lakah si hnih fai ṭheuhin an chak a, Mancini leh a naute tan a awlsam.
Italy fan-ten thlamuang takin zanriah an kil a, zan thla eng lawmin hun an hmang - an hmaah harsatnain a hmuak tih reng an hre lo a, an hmuh phak loh khawvelah chuan buaina chhumpui a zing.
Match hmasa pathuma chak vek team khan match hnih a zawnin draw result an nei a, Lithuania chu 5-0 in sawp leh mah se chak an nei leh tawh lo - Switzerland leh Northern Ireland an inhnehtawkpui leh a, pakhatna an ni zo lo!
Italy-in anmahni el pha ber tura ngaih Switzerland an tum vawi hnihah an inhnehtawkpui ve ve a, an chan tawk chu playoff hmanga World Cup khelh beisei a ni a, an chan a chau ta hle.
Beiseina chauh...
World Cup playoff inkhel tur an pawt a, Italy chu Portugal nen intum thei dinhmunah an ding - team pahnih hian hmabak nei ve ve mah se chak tura ngaih sa nghal an ni a, World Cup khelh inchuha anni pahnih inhmachhawn tur chu khawvelin a hmu châk.
Portugal chu an chak mai a, Italy erawh an chak ve lo - North Macedonia lakah an tlawm a, World Cup beiseina chu an mangṭha zui a, an tla a ni satliah lo a, an mualpho tel. Chu mawlh chu Italian fans tana runthlak chu a ni.
Euro nomawi an chawi theih nana player pawimawh Jorginho, Nicolo Barella leh Lorenzo Insigne ten an thiam an theihnghilh ta em ni chu aw, tih mai turin ram tan an 'form' lo a, Italy hian chhuanlam tur chu an nei.
Tlarhnungah Mancini duhthusama intlar ṭhin Giorgio Chiellini, Leonardo Bonucci, Leonardo Spinazzola leh Giovanni di Lorenzo ten hliam an nei ve reng bawk a, Italy hian an ṭhat dan berin inelna an hmachhawn lo.
A hlui bawk chu
Italy-in Mancini hoin team thar an dinah an inngai a, Euro nomawi an neih miau avangin an inchhalna hi pawmpui mai a hahdamthlak - chutihrual chuan Mancini team din chu rei a rial hmain a nghing nghal a, Italy hrilh a hai.
Darthlalangah uluk takin Azzuri an in en a, an hliam chu rei lo tê atana tuam dam tum ai chuan a dam hlenna tur ngaihtuah a ṭul tih a lang a, hmanhmawh taka chinfel ai chuan a system fel lo lai chu thurchhuah a ngai tih an hai lo.
Hei vang hi a ni ang, Italian Football Federation (FIGC) chuan hmanni lawka European champion nih puitu Mancini chunga an rinna an la nghah fan thu an sawi a, Italian coach tan thu lawmawm a nih rualin a hmaah chona hautak a inchhawp.
Kum 2010 hnuah khan Italian club zingah Europe champion an awm leh tawh lo a, AC Milan, Inter Milan leh Juventus te vanglai ang khan an tualchhung football-ah inelna a sang tawk lo, hemi tuartu langsar chu national team an ni.
Naupang zawng zawngte u!
Italian club-ten European football-a ropui leh duhin, khuarei atana plan mumal siam aiin tuna chinfel an duh a, an hlawhtling thei chuang si lo - chumi tuartu chu Italian player naupangte an ni a, Italy hian rawlthar beiseiawm tia khawvel huapa sawi hluai tur an neih lohna chin a rei ta.
Serie A top club-ten Italian player, kum 21 hnuai lam an neih zat chu chawhrualin 2.7 a ni a, Serie A minute zawng zawngah 4% bak an khel phak lo - chung zinga 80% chu minute 70 hnua bench aṭanga an luh a ni a, an khel tam lo hle.
Chumi a lang chiang tak ta chu Italian rawltharten an ram club ngeiah intuaihriamna hun an nei tawk lo a, a tuartu langsar chu Italy national team a ni - kum uaithla lam tawh, tun hmaa langsar ṭhin player tam takah an la innghah a ṭul a, intuaithar an mamawh.
Mahse, chumi tur chuan an ram club berin player ṭha a pek a ngai a, tunah chuan an pe tam tawk rih lo. Italian football dam tak takna turin, national team mai ni loin, an ram club-ten an ram team ngaihtuah chunga insiamṭhat an mamawh tihna a ni.
An ngaihlu lo
Italian Football Federation chuan playoff an khelh dawn khan, Serie A thuneitute lamah playoff atana inpuahchahna hun an neih tam theih nan March 18-20 inkara an inkhel tur chu sawn mai turin an ngen.
Mahse, Serie A lamin fixtures sawn a buaithlak an ti a, an ram FA dilna hi an pawm lo - North Macedonia an ngaisang lo a nih pawhin, chak ta se Portugal an hmachhawn zui dawn tih an inhre reng a, heti chunga fixtures sawn an duh lo hi thil mak a tling.
FIGC president Gabriele Gravina chuan, "Club-te chuan ram tana player inlan tur neih hi thil lawmawm lam aiin, thil buaithlakah an ngai tlat a ni," tiin Italian club-te na takin a dem.
Gravina hian, "Mancini hi cham se kan duh a, kan tan a rinawm em em bawk," tiin a sawi zui - Italian coach tan kulh tluchhe tawh chu tungding leh turin hna a inṭan nghal a, rawlthar beiseiawm Gianluca Scamacca, Davide Frattesi leh Nicolo Zaniolo te nena a team din thar tur chu Italian fan-te ring fan chungin, nghakhlel takin an thlir mek e.