Zaninah inkhel en châkawm, hmuhnawm, rorum leh pawimawh Mizoram Police Vs Aizawl FC

Mizoram Premier League Season 7 final khel tur zanin dar 7:30-ah chinfel a ni dawn a, Mizoram Police leh Aizawl FC te an inhmachhawn dawn. Tualchhung football ngaina chin chuan a hmuhnawm tur zia an man pha vek a, neutral supporter-in Lammual an pan khawm ang.

I League club hian first leg-ah Police hi 2-1 in an hneh a, goal khatin hma hruai mah se an khingpui hi Mizo player ṭha awm khawmna a ni a. Inkhel hmasa result hian second leg hmuhnawmna a belhchhah chiah zawk.

En châkawm
Aizawl FC coach Gift Raikhan chuan, "Foreigner pahnih ka chhawr dawn a, MPL atana ka team ṭha berin bul an ṭan ang," tiin Vanglaini a hrilh. MPL-ah team pakhatin foreigner pathum an ziaklut thei a, playing eleven-ah foreigner pahnih a chhawr thei a, I League club hian an quota neih ang an hmang vek dawn tihna a ni.

Police nen first leg an khelh ṭum hian Bektur Talgat Uulu leh Alfred Kemah Jaryan ten goal an la khung ve ve a, midfielder pahnih bakah hian Liberian forward Ansumana Kromah an ziak lut bawk. I League best coach ni lai Gift-a sawi dan hmang chuan heng zinga pahnih hian inkhel bul an ṭan nghal dawn.

Foreigner-ah hian a tawp lo, Mizo player-ah pawh MPL-a ṭha ber tura ngaihte an lut dawn a, chuvangin theihna sang vek an inlan dawn tihna a ni a, en a châkzawm takzet.

Mizoram Police an danglam chuang lo, Lalbiaksanga Colney chuan, "Fakzuala a dam tawh a, kan ṭhat dan berin bul kan ṭan nghal thei dawn," tiin a sawi. Police forward Lalfakzuala hian goal sarih khung tawhin MPL7-ah team tan goal a khung hnem ber a, first leg-ah pawh goal khung mah se inhliam vangin bul a ṭan lo.

Second leg-ah erawh Police-in an sa huai an ser nghal ang a; Fakzuala, F. Lalrinpuia, Malsawmfela leh Lalbiakhlua te tlarhmaah an intlar ang a, best player ni lai R. Malsawmtluanga'n midfield aṭangin a chawm dawn a, 'Mizoram Team' tia chhal theih an ni hial ang.

Hmuhnawm
Aizawl FC-in rawlthar duhawm tak tak an nei a, Rochharzela, F. Lalremsanga leh Isak Vanlalruatfela ten khelhna hmun an chang ang em tih hi zawhna awm a ni. Khelhna hmun an chang pha a nih chuan an thiamna leh an ranna hi hmuhnawm a tling pha a, Police defender tawnhriat ngah zawk tan mang chhhia an ni pha dawn.

I League club hian Lalkhawpuimawia, Lalruatfela Zote leh Lalrinfela te an kawl bawk a, tawnhriat nei ngah zawk player-te hi chu Police defender te vauna ṭawngka pawh dawng se zam mai lo tur an ni. Aizawl FC hian an match hnuhnung pathumah MPL champion lai Chhinga Veng nen an inhnehtawk hnuah Kolkata club lian East Bengal leh Police an hneh thei a, an phur vanglai tak a ni.

Police hi season ṭantirhah kim ṭhapin an khel lo a, season chawhnu lamah an kim a, insiamṭha chho zelin tunah chuan an ṭhat dan angin an khel chhuak tawh.

Rorum
Mizoram Premier League ṭan hmaa tualchhung football thununtu chu Mizoram Police an ni a, anni hi team hrang hrangin an ṭhat leh ṭhat loh teh nan an hmang ṭhin. Police ṭhatna ber pakhat chu khelmualah an rorum a, match pawimawh a nih tawh avangin Aizawl FC pawh Police player rorum tak tak hmachhawn turin an inpeih a ngai ang.

Police midfielder V. Lalṭanpuia hi inkhel thiam ber a ni lo mai thei a, amaherawhchu he midfielder hi team hruaitu ropui a tling. Mizoramin Santosh Trophy an champion ṭum pawhin Ṭ-a hi team innghahna a ni a, captain 'rorum' hian bul a ṭan tawh chuan Fakzuala, Valpuia leh Lalramtharmawia te a hnung zui turin an inpeih nghal dawn.

BS-a Colney hote hi tawnhriat nei ṭha tak vek an ni a, mipui thawm vela buai mai mai chi an ni tawh lo. Aizawl FC hian Police player-te rilru put hmang fiah an duh a nih chuan entu neih ṭha se, a chhana an hre nghal thei ang.

Pawimawh
Aizawl FC hi MPL4 an champion hnuah Mizoram inelna sang berah an la champion leh lo a, an tan nomawi chawi a pawimawh takzet. Coach Gift chuan, "State league champion pawimawh zia hi ka hria a, champion hi ka duh. Aizawl FC hi an champion lohna a rei tawh. Tute pawhin khel se final thlen tumin an theihna zawng zawng chhuah an tum a, ka bulah ngeiah min tiam a ni," tiin inkhel pawimawh zia a sawifiah.

Mizoram Police tan a danglam lo, anni hi semifinal lut zingah MPL-a la champion lo awmchhun an ni a. Nomawi an chawi hnuhnun ber chu kum 2012-a I Day Football-a an champion ṭum kha a ni a, hemi ṭum hian final-ah Aizawl FC an hneh.

Police coach BS-a Colney chuan, "Kan inkhel hi a pawimawh a, a hmuhnawm bawk ang. Kan inkhel hmasa zawk pawh kha a hmuhnawm thu min hrilh nasa a, tun ṭumah hian engkim chinfel a nih dawn avangin a hma ai khan la hmuhnawm ang," tiin inkhel pawimawh tur thu a sawi.