Mizoram tan gold pakhat

Nimin khan 64th National School Games boxing inelna bik chu Guwahati, Assam-ah neih zawh a ni a, Mizoramin gold leh silver medal pakhat ve ve a hawn.

Kum 17 hnuai lam tana buatsaih inelnaah hian Govt Bazar High School, Lunglei zirlai Lalnunzira chuan 60 kg-ah gold medal a dawng a, Govt K.V.M High School, Aizawl zirlai Zorammuana chuan 48 kg-ah silver medal a dawng ve bawk.

Inelna hi November 24 aṭang khan neih ṭan a ni a, heta medal la pha chin hi nakkum January thlaa neih tur Khelo India-a tel turin an tling nghal a, Mizo naupang pahnih Lalnunzira leh Zorammuana te hi an tling nghal. December 12-18 inkar hian National Junior Championship a awm leh ang a, heta semifinal lut pha chin hi Khelo India a tel turin an tling bawk ang.

Mizoram aṭang hian mipa leh hmeichhe boxer pasarih ve ve tirh a ni a, mipa team hi coach R.Lalchhuanawma (Sete-a) leh manager H. Sanglura ten an hruai a; hmeichhe team hi coach R.Lalbiaksangi leh manager Ramngaihzuala ten an hruai thung.