Vawiin tlai dar 4:30-ah Mizoram U15 League final

Tata Trusts leh MFA ṭang-kawpin an buatsaih Mizoram Under 15 League final chu vawiin tlai dar 4:30 hian Lammualah Tata Trusts COE leh Aizawl FC Academy ten an khel dawn.

Tata Trusts Head of Sports Bishwanath Sinha chu khuallian a ni ang.

Kum 15 hnuai lam inelna hi Mizoram chhunga kum bihthliah inelna ber, India ramah pawh a ṭha ber pawla ngaih a ni.

Team 10 inelna niin vawi hnih ṭheuh an inkhel chhuak. League round-ah ringawt pawh team pakhatin match 18 an khel vek a, match 140 zet a awm.

League round-ah Tata Trusts hian point 45 hmuin hmahruaitu an ni a, Aizawl FC Academy aiin point riatin an hmu tam zawk. Amaherawhchu team pahnih inkhelh ṭumah erawh 1-0 in vawi khat ve ve an chak a, chungnung zawk an awm lo.

AFC Academy coach B. Malsawmzuala chuan, "Final-ah hian kan player pawimawh Ayush Chhetri chu Under 18 team zinga a zin ve avangin kan chhawr thei dawn lo. Chu ti chung chuan theihtawp kan chhuah ang a, kan chak theih ngei kan ring," tiin Vanglaini a hrilh a, anni hian final thleng tur hian an elpui MFA Grassroots chu 1-0 in an hneh.

Tata Trusts COE pawh an kim bik lo a, an captain TC Vanlalruatfela chu India Under 15 team a zawm vangin league round tawp lamah a inlan tawh lo a, he team-ah hian AFC Academy player Lalchhanhima Chawnghlut pawh telin finalist team hian India aiawh thei tur player pahnih an chher chhuak ve ve tihna a ni.

COE hian Lalruatmawia an chân bawk a, Ruatmawia hi Mizoram Junior Team aiawh tura koh a ni thung.

COE hian league round thunun mah se semifinal-ah Chanmari FC 2-1 in an hneh ṭawk a, knockout stage chin Lammualah khelh a ni a, floodlight hnuaia khelh a nih bawk avangin pressure an nei a, champion chianga dah a rem lo.