Vawiinah MPL khel tur hriat dawn?
Mizoram Premier League khel tur zawnna qualifier league match hnuhnung ber chu vawiin hian RG Stadium-ah khelh a ni dawn. Tlai dar 1:30-ah Venghnuai FC leh New Serchhip ten match hnuhnung ber an khel dawn.
FC Venghnuai hi an match hmasa berah Kanan FC lakah ṭum hnih hnufual mah se K. Roluahpuia leh Isaac Ramfangzauva te hmangin an siphurh an sut ve ve a, 2-2 a inhnehtawkin point hlu tak an hlawh chhuak.
Coach Lalrindika enkawl FC Venghnuai-in first division inelnaah Kanan hneh loin final lut pha lo mah se qualifier-ah erawh an elpui chunga awm theihna hun ṭha an nei a. Venghnuai hian New Serchhip an hneh emaw goal awma an inhnehtawk pui hrim hrim chuan MPL an khel dawn a, Chawnpui aṭanga loan hmanga an lakluh K. Roluahpuia leh David Lalthansanga te an chet ṭhat chuan an dinhmun ṭhatna hi an hmang ṭangkai thei ang.
New Serchhip-in goal an la khung loh avangin MPL khel turin chak ngei a ṭul niin a lang a, coach Lalchhuanawma Pautu (LCh-a) enkawl team hian MPL an khel thei a nih chuan Reitlang FC leh Lunglei FC hnua Aizawl khaw pawn aṭanga Mizoram inelna sang ber khel leh thei hmasa ber an ni ang.
Kanan erawh an match hnihnaa New Serchhip lama goal an khung theih loh avangin match hnuhnung ber result-ah an innghah a ṭul tawh.
Venghnuai leh New Serchhip inkhela goal a lut lo a nih chuan Aizawl DFA first division club pahnih dinhmun hi a inang chiah ang a, playoff hmangin MPL khel tur an zawng ṭha leh dawn a ni.
MPL Qualifier-a pakhatna hi MPL khel turin an tling nghal a, pahnihna hian Ramhlun North nen double legged playoff hmangin Mizoram inelna sang bera khel tur an zawng leh ang.
Vawiina inkhel tur chak lo zawk hi pathumna an ni daih dawn a, inkhel hi nung hle tura beisei a ni.
November 27, Thawhlehni
Kanan FC 2 - 2 FC Venghnuai
KFC : David Lalchhuanawma 21' (P), 71'
FCV : K. Roluahpuia 47'; Isaac Ramfangzauva 90'
November 29, Ningani
New Serchhip 0 - 0 Kanan FC
Vawiin Inkhel Tur
Venghnuai 1:30 PM New Serchhip
# Team Pld W D L GF GA GD Pts
1 Kanan FC 2 0 2 0 2 2 0 2
2 Venghnuai FC 1 0 1 0 2 2 0 1
3 New Serchhip 1 0 1 0 0 0 0 1