Pathianni zanah Merseyside Derby

English football-a derby ngaih-ven hlawh ber pawl Merseyside derby chu Pathianni zan dar 9:45 khian khelh a ni dawn a, Champions League-a chak lo hlim Liverpool chuan Everton an mikhual dawn.

Premier League-ah Liverpool la tlawm lo mah se Nilaini zan khan Champions League-a an vawi thum tlawmna ni turin Paris Saint-Germain chu khualmualah 1-2 in an ngam lo a, rilru leh taksa a chauh avangin Everton tan tun hi hnehna hun remchang tak a ni ang.

Thawnthu hlui

Everton-in Liverpool an lenchilh hnuhnung ber chu January daih tawh khan a ni a, FA Cup-ah inhmachhawnin Reds tana a match hmasa berah Virgil van Dijk chuan goal khung nghalin 2-1 in an chak.

Anfield hrim hrimah Everton hian September 1999 hnuah hnehna an chang leh tawh lo a, an record hi a chhuanawm lem loh hle - Premier League derby bikah October 2010 hnuah Liverpool an la ngam leh lo a, hemi chhung hian league match 15-ah an intawng hman.

Klopp-a fimkhur

Everton laka Liverpool sulhnu thlir chuan Reds hian awlsam taka hnehna an chan leh mai beisei a ni a, Liverpool boss Jurgen Klopp erawh a ṭawng fimkhur hle - hriat tel atana ṭha chu Klopp hian Everton boss Marco Silva hi match hnih a hmachhawn tawhah a la hneh lo ve ve.

Klopp chuan, "Derby a nih avangin a danglam leh bik dawn a ni. Everton hi kum thum liam taa Everton kha an ni tawh lo a, an danglam tawh. Hnehna chang tur chuan 100% kan pek a ṭul a, game hautak hmachhawn tura kan inbuatsaih a ṭul ang," a ti a, a ṭawng pawr duh lo.

Inlan tur

Liverpool captain Jordan Hender-son chu league match hnuhnung berah red card a hmuh avangin zaninah a inlan thei dawn lo a, Liverpool player dang zingah inlan thei lo tur an awm lo.

Everton player zingah hrem an awm lo a, an dam kim bawk. Richarlison, Jordan Pickford, Andre Gomes leh Gylfi Sigurdsson te an neih vangin Reds tan zuam loh a fin thlak ang.