MSL final-ah a zawnin Zarkawt BCA

Zarkawt BCA chuan a kum zawnin Mizoram Super League final an khel dawn ta. Ningani zan semifinal game 2 inkhelah BCA hian Mission Veng Vikings chu 90-55 in an sawp.

Champion lai Zarkawt BCA hian match thum khelh tur zinga a hmasa pahnihah hnehna an chan theih avangin an tlang nghal. Semifinal lehlama inkhel Tuikual South leh Khatla TBL inkhela chak zawn nen nomawi an inchuh dawn a ni.

A bul chu

Hawla Indoor Stadium, Republic Vengthlanga inkhelah team pahnih an fimkhur a, MSL3 champion Mission Veng Vikings hi game 1-ah an tlawm tawh avangin an tan chak loh nawn a thiang lo.

Quarter hmasa berah tihsual an ngah chungin team pahnih hi 14-14 in an inhnehtawk a, basket neih hnem aiin a venhim lam an ngai pawimawh tih a chiang. Hemi quarter bikah hian point ruk score-tu Dijon Najee Farr chu a langsar ber a ni.

Afela thluak

Zarkawt BCA lamin Cameron Anderson leh Matthew Remtluanga Sailo te quarter hnihnaah an dah lut a, an thil tumah an chiang. An mahni basket an venghim tluan thei a, an khingpui tihsual hrem turin Lalrina Renthlei bakah feet 6 leh inches 8 zeta sang Anderson a awm tawh bawk.

MSL chanchina a vawi khat nan hemi quarter bikah hian Vikings lamin point khat mah an neih belh lo, coach Lalruatfela naute erawhin point 24 ngawt an neih belh thung. Player siksawi chungchangah Vikings coach aiin Afela'n thutlukna a siam fuh zawk tih a lantir.

Lalrina Renthlei chuan a zawnin 3-point a vawm lut thei a, Tuikhuahtlang tlangvalin a thiam thil a lantir zawh hnu chiah hian American player Anderson chuan chiang zetin a 'dunk' zui zat, Vikings player Lalruatkima Sailo tan dan theih a ni lo - a tawp thlengin BCA an chungnung zui tawh a ni.

A ṭha ber

Mission Veng Vikings manager H. Lalhruaitluanga chuan, "MSL champion lai leh Mizorama team ṭha ber ni bawk kan hmachhawn a, keini lam team naupang tak tan chuan a harsa deuh a ni. Chutih rualin kan tan tawnhriat ṭha tak a ni nghal bawk, tualchhung basketball level a san tawh zia kan zir chhuak a ni," a ti. Hruaia hian an mahni thlawp ṭhintu Vikings chhungkaw chungah lawmthu a sawi bawk.

Zarkawt BCA coach Lalruatfela chuan, "Dijon dan kan tum a, kan ti hlawhtling thei. Ka nauten ka beisei phak baka ṭhain an khel, chutih rual chuan Vikings khelh ṭhat loh ni kan tawng fuh a ni, an shot a lut lo hloh zel kha kan vannei. Basket neih hnem ringawt loin a venhim lam kan uar ta deuh a, kan duh leh tum angin kan khel chhuak thei a ni," tiin Vanglaini a hrilh.