North London Derby

Pathianni zan dar 7:30 hian Premier League inkhel hmuhnawm leh boruak sang a awm dawn. Arsenal khelmual Emirates Stadium-ah an hmelma kumhlun Tottenham an lenglut ang; North London Derby hi vawi 196 an khelhna tur chiah a ni.

Arsenal hian hlawhtlinna lian an chan hnem tawh zawk avangin Tottenham hi an hnuaichhiah ṭhin a, tun hnai an intawnna aṭanga teh erawh chuan Spurs hi team ṭha zawk an ni. Tun dinhmunah pawh Mauricio Pochettino naute table-ah an sang zawk.

Fiahna

Unai Emery-a'n Arsenal a enkawl tirh khan team lian a hmachhawn nghal a, Premier League an match hmasa pahnihah Chelsea leh Manchester City an ngam lo - Spanish manager hian an chak loh hnuah a team din chu hma a sawn pui zel a, an league match hnuhnung 11-ah chak loh nei loin an kaltluang.

"EPL kan ngai pawimawh ber a, a dawtah Europa League leh a dangte," tia sawi tawhtu Emery-a'n a rilru a la thlak lo. Ningani zana Europa League khel tur pawhin player naupang rual bakah senior team lama a chhawr rim loh ho a hruai a, Vorskla Poltava chu 3-0 a hnehin Group E hmahruaitu chu an ni ta tho.

Sevilla manager Emery chuan, "Match 18 chhung tlawm loin kaltluang thei mah ila kan khingpui hi team lian an ni rih lo," tiin a sawi a, a ṭawng fimkhur hle. Nilaini zanah Manchester United nen an intawn zui dawn avangin an tan tun hun aia 'fiahna' hun dik a awm thei rih chuang lo ang.

A hun chiah

Tottenham midfielder Harry Winks chuan Arsenal nen an inkhelh tur chu an tan hun duhthusam a nih thu a sawi. Poch-a naute hian an league match hnuhnungah Chelsea 3-1 in an hneh a, Champions League-ah Inter Milan 1-0 in an hneh zui bawk - an boruak ṭhat vanglai a ni.

Winks chuan, "Inelna hrang hrangah a zawnin vawi ruk kan chak thei a, tun ṭum erawh a harsa dawn. A awlsam dawn lo tih hre mah ila kan team boruak en chuan derby khelh nana hun ṭha tak a ni," a ti a, defender Jan Vertonghen dam tawh chu thlamuan thlak a tih thu a sawi bawk.

Tottenham hi an kaltluang viau a, an tan December thla hi fiahna a ni ve dawn tho. Tun thla chhung hian league match vawi sarih an khel dawn a, Barcelona nen UCL an khelh dawn bakah Carabao Cup quarterfinal-ah Gunners nen an intawng dawn bawk.

Striker Hot

Harry Kane-a'n 2015 khan league goal 21 a khung a, 'one-season wonder' bak a ni lo ang tih chu a chungchang an sawina langsar tak a ni. Mahse, England international hian a zawnin season li chhung chu goal 20 chuang a khung ta! Season kal laiah pawh match 13 aṭangin goal sarih a nei leh tawh.

Spurs tan Kane bakah ram tana a khelhpui Dele Alli chu a hliam a dam hnuah a khel ṭha chho leh mek a, Christian Eriksen-a'n a thiam a theihnghilh lo tih lantir nan tun hnai a match hnuhnung pahnihah assist vawi thum a nei bawk - Gunners tlarhnung tan an tawrhhlelhawm khawp ang.

Arsenal lamin Kane elphak tur Pierre-Emerick Aubameyang an nei ve tho a, Gabon international hian goal riat a neih tawh avangin a hun taka rah ṭhin a nih zia sawi nawn a ngai lo. Alexandre Lacazette dinhmun a la chiang lo a, a khel thei a nih chuan Auba nena an inkawp dan chu thil awlsam a ni bik lo.

Zanin Inkhel Tur
Crystal Palace 8:30 PM Burnley
Huddersfield Town 8:30 PM Brighton & Hove
Leicester City 8:30 PM Watford
Manchester City 8:30 PM AFC Bournemouth
Newcastle United 8:30 PM West Ham United
Southampton 11:00 PM Manchester United
December 2, Pathianni
Chelsea 5:30 PM Fulham
Arsenal 7:35 PM Tottenham Hotspur
Liverpool 9:45 PM Everton