Chhinga Vengin final an thleng ta

Mizoram Premier League champion lai Chhinga Veng chuan Ningani zan khan Chanmari FC 1-0 in semifinal second leg-ah an hneh a, first leg-a an chakna nen belhkhawmin 2-0 in hnehna an chang. Chhingcows hi league round-ah pakhatna an ni a, tun season-ah vawi khat chauh chak loin final kalkawngah harsatna an tawk lo.

MPL7 final hi December 7, Zirtawpni zana khelh tura ruahman a ni a, amaherawhchu Aizawl FC-in Mizoram Police an hneh a nih chuan I League an khelh a ṭul dawn avangin nomawi chawi tur zawn hun hi sawn hlat a ngai dawn.

Thawh chhuah tum Chanmari

Chanmari coach Chawngthan-sanga'n hnehna chan tumin starting eleven a siksawi a, goalkeeper-ah MS Dawngliana a rawn lut ve thung a, R. Lalawmpuia a inhliam avangin Thomas Lalengkima a rawn inlan a. Tlarhma lamah Vanlalbiaa Chhangte leh Lalnunzama te chu Laldampuia leh MC Malsawmzuala te aiah luhtir an ni bawk.

Chawnga'n risk lain Chhingcows midfield tih chhiat tumin winger tlan chak Mabiaa a hmang niin a lang a, hun pawimawha Zama a rin chhan hi MC-a a tlan tam zawk vang niin a ngaih theih bawk.

Chhinga Veng midfield-ah Lalrinchhana a rawn let a, mual sirah rinlawk angin F. Lalnuntluanga'n bul a ṭan a, right back pangngai Vanlalchhuanga chhawr tawhin defence laiah Vanlalzuidika sawn lutin K. Lalthlahlova a awl thung a. Ivorian forward Gatch Diomande chu hmatawngah awmin MS Dawngliana, Lalromawia leh Tluanga ten an thlawp bawk.

A goal hma

Chanmari FC-in goal mamawh zawk mah se minute hnihna lekah Chhingcows-in an chance neih hmasak berah goal an khung nghal. Chhinga Veng forward Dawngtea chuan dinglamah ball lalutin a cross ball chu C. Muana'n dang perin keeper MS-a'n dan theih a ni lo a, 1-0 a ni nghal.

Goal dang a lut tawh lo a, Chhinga Vengin aggregate-ah 2-0 in hnehna an chang. Tun season-ah team pahnih hi vawi nga an inhmachhawn a, Chhingcows hi vawi li chakin vawi khat dangah an inhnehtawk a, an record thlirin Sanga hoten final thlen an phu tih a lang chiang hle.