Sarri duhthusam a thleng ta

Chelsea manager Maurizio Sarri-a'n Europa League group match hnuhnung ber khelh hma ngeiin a chung bera awm a duh thu a sawi a, tunah chuan an dinhmun a chiang ta. Anmahni hnaih bertu PAOK Salonika 4-0 ngawta an sawp avangin Group L-ah an dinhmun chuh buai phak an awm tawh lo.

Ningani zan Stamford Bridge-a inkhelah mikhual defender Yevhen Khacheridi chu minute sarihna lekah hnawh­chhuah a ni a, a hnu lam zawng chu Blues chan a ni. Olivier Giroud-a'n goal hnih a khung bakah Callum Hudson-Odoi leh Alvaro Morata ten goal khat ve ve an khung ve bawk.

Chelsea hian December 13 zanah Hungarians club MOL Vidi an hmachhawn leh dawn a, Vidi hian knock out stage luh beiseina an la nei. Blues hneh lotu PAOK hian pahnihna nilai BATE Borisov an hmachhawn ve leh thung ang.

An tho chhuak

Sarri-a nauten match 18 chhung hneh loh nei loa an kaltuang chu Tottenham lakah tihtawpin a awm a, Italian manager hian an khelh ṭhat loh thu a pawm thlap. Greek club lakah erawh Chelsea an tho chhuak, player tam zawk a khel chu ni bawk mah se kawng eng­kim­ah a chungnung zawk an ni.

Striker pahnih Giroud leh Morata ten goal an khung avangin Sarri a lawm a, a lawmna belhchhah turin World Cup Under 17-a England champion puitu Hudson-Odoi chuan a club tana a goal hmasa ber a khung bakah minute 90 chhung a khel ṭha hle bawk.

Chelsea manager Maurizio Sarri chuan, "Ni thum dan lek­ah match khelh hmabak kan nei zel a, hei vang hian player siksawi nasat a ngai hle. Player tawnhriat ngah Cesc Fabregas kha inkhel khaikhawmtu niin mual laiah a khel ṭha takzet," tiin a sawi.

Fak phu PAOK

Beiseina tlemte nei chungin Greek fan-ten London an pan a, inkhel ṭantirh lama an talbuaina vangin an beiseina chu hmeh mih sak an ni. Hamrik hmasa ber a rik aṭanga a hnuhnung ber a rik thlengin PAOK ṭantute an zai tluan parh thei.

Team pahnih te hi September thlaa an intawn ṭumin Chelsea hian 1-0 in hnehna an chang, an intawn vawi hnihnaah PAOK hian goal zawna pet an nei miah lo a, match hnuhnung ber khelh hmain knock out stage an luh beiseina chu a tawp ta a ni.

Group hmahruaitu Chelsea tan last 32-ah AC Milan, Lazio leh Sporting Lisbon te chu an hmachhawn theih zingah an awm dawn a, Blues manager Sarri tan hna hautak hmachhawn thei tura inbuatsaih a finthlak ang.

Inkhel dang

FC Salzburg chuan Leipzig nen Red Bull derby an khelhah 1-0 a hnehna changin knockout stage an lut ve bawk a, anni bakah hian Zenit St Petersburg leh Sporting te chu an inpet tling ve bawk.

Austrian champion Salz­burg hian season hmasa khan semifinal an thleng thei a, kum­inah pawh beiseina an nei sang. Group B hmahruaitu an nih theih nan hian Fredrik Gulbrandsen chuan minute 74-naah chakna goal awmchhun a khung.

Zenit pawhin Group C hma­hruaitu ni turin Robert Mak-a goal khat hmangin FC Copenhagen chu 1-0 in an hneh. Arsenal awmna Group E lamah pawh Sporting chuan Qarabag 6-1 a hnein an tlang a, an group aṭangin Arsenal hnung an zui.