Ronnie Screwvala-a'n I League club duh

UTV Group neitu zinga mi sumdawng hausa tawntaw Ronnie Screwvala chuan I League club neih a duh thu a sawi chhuak a, season tharah I League club a nei a nih pawhin a mak lo ang.

Kum 67 mi Ronnie hi infiamna lamah a inhmang hle a, sum tamna Pro Kabaddi League lamah pawh club U Mumba neiin Thawhṭanni khan Pro Volley League lamah Volleyball club thar a lei bawk.

Screwvala chuan Indian Super League-a club neih aia I League a duh zawk chhan sawiin, "Football-ah chuan a ler aṭanga ṭhuai ai chuan a bul aṭanga a nih dan tur diktaka engkim kalpui kan duh a, grassroots kan ngai pawimawh a ni," tiin a sawi.

UTV Group founder chuan All-India Football Federation (AIFF) nen inbiakna an kalpui mek thu leh thu chiang erawh a la awm loh thu a sawi bawk.

Indian Super League boruak karah I League-in ngaihven a hlawh ve zel a, entu pawh season dang zawng aiin an tam. Vawiin tlai dar 5:30-ah Mohun Bagan chuan Chennai City an mikhual dawn a, Pathianni tlai dar 5:00-ah Shillong Lajong chuan Neroca an mikhual thung ang.