Sawmtea'n Jamshedpur a zawm

Mizo midfielder hriat hlawh Malsawmzuala chuan loan-in Jamshedpur FC a zawm a, season tawp thleng Tata Steel club tan hian a khel dawn a ni.

Bengaluru FC aṭanga a professional career ṭantu Sawmtea hian Bangalore club tana a khelh laiin Delhi Dynamos-ah loan-in a lo khel tawh a, season ṭan dawn khan ATK chu Bengaluru aṭang hian a pan.

Mahse, Kolkata club-ah a beisei anga hmun a chan theih loh avangin Jamshedpur hi a pan. Chanmari FC midfielder hlui chuan, "JFC-ah hian hmun tam zawk chan theih beiseiin ka kal a ni," tiin ATK a chhuahsan chhan Vanglaini a hrilh.

Jamshedpur hian zanin­­ah league match an khel nghal dawn a, dar 7:30-ah NorthEast United an mikhual ang. JFC-ah hian Chanmari FC tana Sawmtea nena khel dun ṭhin Jerry Mawihmingthanga chu Mizo awmsa a ni.

Pathianni zan dar 7:30-ah inkhel a awm dawn bawk a, Chennaiyin FC chuan Sawmtea chhuahsan tak ATK an mikhual ang.