Aizawl FC hmaah Police beiseina thamral

Mizoram Police-in Mizoram chhung football inelna sang bera champion an beiseina chu Inrinni zana Aizawl FC lakah a thamral. Semifinal second leg-ah hian team pahnih hi 2-2 in inhnehtawk mah se first leg-ah Gift Raikhan-a hote 2-1 in hnehna an chang a, I League club-in kum zawnin final an lut.

MPL-a vawi hnih champion tawh Aizawl FC hian final-ah season liam taa an hneh loh Chhinga Veng an hmachhawn dawn a, nomawi inchuhna hi December 7 atan ruahmanna siam ni. Amaherawhchu, I League khela AFC an zinchhuah dawn avangin MPL Board-in loh theih loin inkhelh hun an thlak danglam a ṭul ang.

Thlirlet ila
MPL semifinal hi minute 180 khelh a ni a, chuvangin kar khat liam taa thil thlengin Aizawl FC tan final kawng a awlsam phah. First leg-ah Bektur Talgat Uulu freekick hmangin AFC-in hma an hruai a, Police-in Lalfakzuala goal ropui hmangin sut. Injury time-ah substitute Alfred Kemah Jaryan chuan kawh zetin first leg bika chakna goal a khung.

Bektur-a freekick hi goal khat a ni satliah lo a, AFC coach Gift-a'n midfield-ah player rintlak pakhat a neih belh tiin a sawi theih. Aizawl FC player pakhat chuan Alfred-a chu training-naah pawh a ball pet a ṭhat thu a sawi a, chuvangin 'vannei' tih ṭawngkam aiin goal khung theihna a nei let tia sawi a rem zawk, Liberian midfielder tiha kan hriat lar hi Mizoram a rawn kal hma leh awm tirha forward ṭhin a ni.

Police tan pawh goal hmaah Fakzuala a hmui tih a lang a, an tho chhuak dawn a nih chuan inkhel bul a ṭan a ṭul tih a lang. Chutihrualin BS-a Colney tan thutlukna siam a ṭul a, Fakzuala a luh hian khawiah nge Malsawmfela leh F. Lalrinpuia te an chhawr tak ang tih zawhna a awm nghal.

Thulukna an siam ta
Aizawl FC coach Gift Raikhan chuan foreigner pahnih Alfred leh Bektur te chungah rinna a nghat a, bul ṭan tir ve ve ve a. Team captain Alfred-a hi Lalkhawpuimawia aiah rawn lutin player dang zawng chu first leg-a bul ṭantute vek an ni.

Police coach BS-a Colney erawhin rin lawk ang ngeiin Fakzuala luhtir mah se Sawmfela chu bench-ah a dah thung. Goal mamawh zawk an ni nachungin an fimkhur tih a lang a, Lalsangbera aiah midfielder H. Lalbiakthanga rawn lutin captain V. Lalṭanpuia damloh vangin Lalramtharmawia chuan a hmun ruak a rawn luah bawk. BT-a leh Mamawitea ten defence an pui a, Fakzuala chu hmatawngah hmangin a hnung chiahah R. Lalmalsawmtluanga a awm a, mual sirah Valpuia leh Lalbiakhlua te an awm thung.

Police tlarhnung pawh tih danglam a ni a, Ronald Zothanzama chu defence laiah B. Zoramthanga hmunruak luahin Lalhmunmawia nen an inkawp a. MPL1-a Dinthar champion puitu R. Lalthantluanga rawn inlan hlawlin left back atan chhawr a ni a, ding lamah Lalruatpuia sawn a ni. First leg aṭangin player pasarihin bul ṭan nawn mah se position ang zawnga thlir chuan keeper F. Lalmuanawma, defender Ahmuntea leh winger Biaktea te chiah position ngaiah an awm.

A goal hma
Mizoram Police-in bul an ṭan ṭha, Hualngohmun tlangval Mamawitea chuan box pawn aṭangin kawh zetin a pet a a, Fakzuala hnung fuhin keeper Lalawmpuia beisei lohna lamah ball a kal a, minute kuana lekah 1-0 a ni.

First leg nena chhiar kawpin 2-2 a ni chiah a, heti hian inkhel tawp se penalty shootout hmanga chak zawk zawn tur a ni a, starting eleven-a tawnhriat ngah zawk Police chu final khel turin an rinawm ta zawk.

Police muthlu
Police tlarhnung hming en a, player ṭha tak nia lang chu khelmualah an inkawp rem lo. Aizawl FC-in Alfred-a hoin midfield an thunun zawk a, BT-a leh Mamawitea te an khel dun tam lo tih a lang a, Police tlarhnung a nghing nasa bawk.

Minute 16-naah AFC-in siphurh an sut nghal a, best keeper ni lai F. Lalmuanawma pawh che fuh bik loin box chhunga ball chang fuh Rochharzela'n a hun ṭha neih hlah loin siphurh sutna goal a khung. AFC dinhmun a ṭha a, inkhel thunun chhunzawmin minute 28-naah hmun awl ngah Alfred-a'n kawh zetin goal ban a per a, hemi let hi Hmangaihkima'n a tauh goal nghal. AFC midfielder insiamrem rang lutuk hian fak a phu a, Police defender erawh an awmna turah an awm lo tih a chiang.

Beiseina nung
Mizoram Police-in goal an mamawh tih hriain first half tawp lamah Malsawmfela an luhtir nghal a, tawnhriat nei forward hian Police goal nawr tihlauhawm sawt mah se midfield erawh a siam ṭha tel lo. Chutichung chuan Police-in goal an khung ta tho a, MPL6 best player MS-a'n box pawn aṭangin keeper AwP-a tana dan ngaihna awm loin a volley lut.

Second leg-ah 2-2 a ni chiah a, Police-in Aizawl FC nih rual turin goal khat dang an la mamawh. Minute 35 hun an la neih avangin inkhel a nung thar hle.

Lemchan hmuhnawm
Aizawl FC-in Lalkhawpuimawia an luhtir a, Kelkang tlangval hian keeper Muanawma chauh ṭum hnih hmachhawn mah se a hlah ve ve a, dinhmun himah I League club a dah thei lo.

Hei vang hian hun tawp thlengin Police-in beiseina an nei a, mual sira che thei lo Valpuia chu a laiah sawn lutin an goal nawr a na sawt. Amaherawhchu Republic Veng tlangval vanneih zan a ni lo a, ṭum khat ṭha zeta a lakluh hnuah a pet over a, penalty a beisei pawh referee-in a pe lo bawk.

Hun tawp lam thil thlen dan chu lemchan ang mai niin Police midfielder MS-a'n freekick aṭangin crossbar a per a, Valpuia bawkin a tawp kharin ball in a kut a per chu referee-in hmu loin hnai set sawt aṭangin a pet over nawn. Aizawl FC an ṭang tluan a, minute 180 chhunga khel ṭha zawk I League club-in final an lut.