Mizoram U15 League champion Tata Trusts COE

Mizoram Under 15 League final-ah Tata Trusts COE chuan Inrinni zan khan Aizawl FC Academy 2-1 a hnehin an champion. Pahnihna Aizawl FC Academy hian fairplay award an dawng thung.

MFA leh Tata Trusts ṭangkawpin an buatsaih inelnaah hian position tina player ṭha ber thlanchhuah a ni a, best player-ah Aizawl Grassroots Centre midfielder Lalrempuia thlan a ni a, Ramthar rawlthar hian best midfielder chawimawina dawng bawk.

Final hmuhnawm

Tata Trusts COE leh Aizawl FC Academy te league round-ah vawi hnih inhmachhawnin 1-0 ve ve in an chak a, final-ah pawh team pahnih an intluk tawk hle.

Hun chanve hma lamah goal a lut lo a, minute 56-naah COE forward Rakesh Singh-a'n AFC Academy defender tihsual nang fuhin keeper chiah a hmachhawn hnuah cool takin goal kilah a khung. AFC Academy-in minute khat pawh a ral hmain an sut leh nghal a, goal luh dan pawh a inang hle. Ricky Lalramnghaka chuan box chhungah ball chang fuhin kawh zetin a volley lut a, 1-1 a ni.

Minute 62-naah Rakesh-a bawk a rawn lang a, ani hian inringtawk takin AFC Academy defender hmaa ball a chawh kual hnuah goal kilah a pet a, keeper tan dan theih tura lang ni mah se a nam per zawh loh avangin COE-in 2-1 in hnehna an chang.

Inelna changtlung

Football hmasawnna tura buatsaih Mizoram Under 15 League hi kumin August 4 aṭang khan khelh ṭan a ni a, kartawp leh school chawlh ni apiangin an khel ṭhin.

Inelnaah hian team 10 an tel a, vawi hnih ṭheuh an inkhelh chhuah hnuah a sang paliin semifinal an lut. Knockout stage lut pha lo chin pawhin match 18 vek an khelh avangin inlena aṭang hian naupang ṭhahnem takin football-ah hmasawnna an neih beisei a ni.

Lawmman
Champion Tata Trust COE Rs 50,000
Pahnihna Aizawl FC Academy Rs 30,000
Semi-finalists Chanmari FC & Aizawl Grassroots Centre Rs 20,000 ve ve
5th position M 28 Academy Republic Veng Rs 18,000
6th position Sihphir Venghlun FC Rs 16,000
7th position FC Stonzz Armed Veng Rs 14,000
8th position Kanan FC Rs 12,000
9th position Bawngkawn GSA Rs 10,000
10th position Competitors for Christ Rs 8,000
Fair Play Aizawl FC Academy Rs 20,000
Mimal Lawmman
Best Player Lalrempuia Aizawl Grassroots Centre Rs 2,000
Best Forward Lalthanpuia Aizawl FC Academy Rs 2,000
Best Midfielder Lalrempuia Aizawl Grassroots Rs 2,000
Best Defender Zlex Mangang Tata Trust CoE Rs 2,000
Best Goalkeeper Lalrinzuala Tata Trusts CoE Rs 2,000