Real beiseina a la ral bik lo
Spanish La Liga khelh kal laiah Real Madrid talbuai deuh ṭhin mah se an beiseina a la thamral bik lo. Manager thar Santiago Solari enkawl team hian Inrinni zan khan Valencia 2-0 in an hneh a, table-ah pangana dinhmun an luah leh ta.
Santiago Bernabeu, Madrid-a inkhelah Valencia defender Daniel Wass chuan minute riatna lekah an mahni lamah a tauh lut palh a, hun tawp dawnah Lucas Vazquez-a'n an chak nemngheh nan a khung ve bawk.
October thla aṭanga Real Madrid enkawltu Solari-a'n a nuate hi match sarih a kaihhruai tawh chinah vawi ruk an chak a, manager nghet a nih hnuah erawh an chak vawi hnihna chiah a ni thung.
Insiksawi
An league match hnuhnung zawkah Real Madrid hi Eibar hneh loin an mualpho a, Champions League lamah erawh AS Roma 2-0 in an hneh thung. Valencia lakah Solari-a'n a naute a siksawi nual a, a hlawhtlin puiah a ngaih theih.
Defender rinrawl Marcelo a inlan theih loh avangin Sergio Reguilon tan hmun a awm a, midfielder ball pet thiam Toni Kroos aiah Dani Ceballos dah a ni bawk. Ani bakah hian UCL lama khel ṭha midfielder Marcos Llorente pawhin hmun a chang nawn a, tlarhmaah Lucas Vazquez dah a ni.
Real Madrid lamin inkhel bul an ṭan fuh a, mual sir aṭanga Gareth Bale-a cross ṭha zet chu Karim Benzema-a'n lo volley mah se goal ban hrulah a chhuak hlauh. Wales international Bale hian goal khung theihna hun ṭha nei mah se a ball pet na tak chu Valencia keeper Murara Neto chuan a dan sak.
Valencia lamin goal khat an phurh laiin an siphurh sut theihna hun ṭha an nei. Amaherawhchu, chan loha awm forward Santi Mina chuan yard 10 leka hla aṭangin a pet over a, Arsenal defender hlui Gabriel Paulista pawhin hnai setsawt aṭangin a hlah bawk.
Solari a lungawi
Real Madrid manager Solari chuan, "Team lian chuan inelna hrang hrang kan hmachhawn tam a, hei vang hian squad chhunga player zawng zawng inkhel tura an inpeih vek a pawimawh. Player ṭha ṭhenkhat chu bench-ah dah an ngaih chang a awm a, a bik takin Isco pawh lungawi taka a awm bakah khelmual a luh hnua a chetdan khan min ti lawm hle," tiin Spain international bench-a a dah chungchang a sawi.
Argentine manager chuan sawi zawmin, "Player tin an khel ṭha, Bale leh Benzema ten hun ṭha an insiam thei a, anni khan goal khung lo mah se Valencia tlarhnung tan an hnawksak hle, tunah chuan ṭha taka season kan hma zawh theih nan kan thawkrim chhunzawm dawn a ni," a ti.
Real Madrid hian Ningani zanah Copa del Rey khel turin Melilla an lenchilh dawn a, kar tawp league match-ah kai thar leh table mawngphah ni bawk Huesca an lenchilh zui leh nghal bawk ang. Real tan an elpui club dangte kal filawr an awm theih loh avangin nomawi beiseina a la bo bik lo.