Africa Cup of Nations thleng tur a chiang ta lo!

Nakkum nipui laia khelh tur Africa Cup of Nations thleng turin Cameroon thlan fel an nihna a rei tawh a, mahse inbuatsaihna an neih ṭhat tawk loh avangin Confederation of African Football (CAF) chuan a thleng tura an tih Cameroon chu an hnawl leh hnuhnawh thu an sawi.

Zirtawpni khan CAF hruaitute hi Accra, Ghana-ah an inhmukhawm a, darkar 10 chuang an sawi khawm hnuah Cameroon chu an khawmualpui inelna lian thleng tlakah an ngai lo a ni.

Thuchhuah siamin CAF chuan, "An hma lak dan ngaihtuah hian lawmna tur a tam lo a, tun anga an kal a nih chuan inelna an thleng thei dawn chuang lo. Hei vang hian hmun dangah chawpchilh taka nghah a ngai dawn a, a hmun thar tur hi kumin chhung ngeia puan chian hman tum a ni," an ti.

Africa Cup of Nations hi nakkum June leh July thla chhunga khelh tur a ruahman a ni a, team 16 ni ṭhin khan team 24 an ni tawh dawn. CAF president Ahmad Ahmad chuan, "Hun lo kal zel turah pawh Cameroon hian a thleng nawn leh kher ang em tih chu zawhna lian tak a ni," a ti.