Inkhelh thiam vengah Venghnuai a chhiar leh theih ta
MPL8 Qualifier match hnuhnung berah Venghnuai FC leh New Serchhip 1-1 in an inhnehtawk a, Aizawl DFA hnuaia club hian season tharah Mizoram chhunga inelna sang ber an khel dawn. Aizawl khaw pawn club New Serchhip tan erawh MPL beiseina a tawp thung.
Inrinni khan RG Stadium-ah inkhel pawimawh hi khelh a ni a, FC Venghnuai tan Lalhmangaiha chuan New Serchhip midfielder Vanlalremkima (Tetea) handball vanga an penalty hmuh chu goal-ah a chantir a, 1-0 a ni. New Serchhip-in Electric Veng aṭanga loan hmanga an hawh Tetea hian a tihsual siam ṭhat nan ṭha zetin corner a pet a, Ramengmawia'n a tauh lut a, minute 26-naah siphurh an sut.
Goal awma an inhnehtawk avangin Venghnuai FC-in goal dang an chhuah belh loh chuan MPL an khel dawn. Amahreawhchu vanduai theih a nih avangin Venghnuai hian an nawr chhunzawm a, goal erawh an khung belh tawh lo.
Venghnuai coach Lalrindika chuan, "Hmanlai chuan Venghnuai tih chuan, inkhel thiam turin an ngai nghal tawp ṭhin. Khang hun kha a liam a, tunah Venghnuai Mizoram Football ah kan rawn let leh ta e. Veng mipui pawh kan phur hlein ka hria," tiin an veng chu inkhelh thiam veng a nih leh thu a sawi.
Rindika chuan sawi chhunzawmin, "New Serchhip kha team ṭha tak an ni a, chak loh chuan tla thei dinhmunah kan ding ve tho a, goal chance tam tak kan hloh hnu phei kha chuan, kan vanduai dawn niin ka hre hman. Mahse, a tawk te in Pathianin ro min rel sak a ni. 1st div league-ah table pahnihna kan ni a, kha mi chhung zawng khan kei aia coach senior vek ka hmachhawn a, tun qualifier-ah pawh Mizoram coach ṭha ve ve ka hmachhawn chunga dinhmun duhawm ka chang hi ka lawm a, hmasawnna tur tam tak ka chhar thar bawk. MPL coach ṭha tak tak hmachhawn turin ka naupanna chhuanlam ka tum dawn lo," tiin Vanglaini a hrilh a, player-te leh club hruaitute vanga an tum ram thleng thei an nih thu a sawi tel bawk.
November 27, Thawhlehni
Kanan FC 2 - 2 FC Venghnuai
KFC : David Lalchhuanawma 21' (P), 71'
FCV : K. Roluahpuia 47'; Isaac Ramfangzauva 90'
November 29, Ningani
New Serchhip 0 - 0 Kanan FC
December 1, Inrinni
FC Venghnuai 1-1 New Serchhip
FCV : Lalhmangaiha 20' (P)
NSP : Ramengmawia 26'
# Team Pld W D L GF GA GD Pts
1 Venghnuai FC 2 0 2 0 3 3 0 2
2 Kanan FC 2 0 2 0 2 2 0 2
3 New Serchhip 2 0 2 0 1 1 0 2
MPL Playoff
Leg 1 : December 4, Thawhlehni
Ramhlun North 1:30 PM Kanan FC
Kanan FC 1:30 PM Ramhlun North