Tuikual South-in TBL an ‘Bye Bye’

Mizoram Super League semifinal game 2 chu Zirtawpni zan khan Hawla Indoor Stadium, Republic Vengthlangah khelh zawh a ni a, Tuikual South chuan Khatla TBL lakah 83-72 a hnehin changin final an lut, game 1-ah TKS hian hnehna an chan tawh avangin series 2-0 in an la a ni.

December 11 zanah final game 1 khelh a ni dawn a, champion lai Zarkawt BCA leh Tuikual South ten nomawi an inchuh dawn, season hmasa finalist pahnih bawk an intawng leh dawn tihna a ni - tun season legaue round lamah BCA hian hnehna an chang tawh.

TKS an tlang

MSL season hmasa pahnih champion Khatla TBL hian tun season an match hmasa berah Tuikual South hi 102-83 in an hneh a, semifinal-ah pawh harsa lutuk loin an paltlang leh mai thei tura ngaih a ni.

Mahse, beisei leh rin lawk ang ngawtin thil a kal bik lo. Phengphehlep hian game 1 an lak hnuah pawh an dingnghet zui a, Desmond Antwine Medder-a point 32 score hmangin hnehna an chang nawn.

Game 2 bikah hian TKS tan tualchhung player an thawhhlawk hlawm hle - Lalnunpuia, Vanlalrinchhana leh F. Zodinthara te chuan point 10 chuang an nei vek. TBL lamin player ṭha an lakkhawm hmangin thawh chhuah tum ngial mah se an thei lo. Fans nei ṭha bera chhak ngam Tuikual lamin TBL an 'Bye Bye'.

Thawhrim rah

"Inelna neih hma aṭang tawh khan kan thawkrim em em a, kuminah hian hlawhtlinna chan ngei tumin kan bei a ni," tiin Tuikual South manager Lalremsiama Hrahsel chuan Vanglaini a hrilh.

Siamtea chuan sawi zawmin, "Court nal deuha kan khel chungin kan player an insiamrem zung zung thei a, kan khingpui ten min rawn hnaih deuh lai pawha buai loa kan tlang thei kha a lawmawm hle," a ti a, coach Vivek Pandey leh assistant coach R. Liansangpuia te ruahmanna fing tak chu an chakna hnar a nih zia a sawi bawk.

Tuikual tan final luh hi chanchin lawmawm a ni a, a chak lo TBL tan erawh an elpui club dang player ṭha ChP-a leh Mission Veng Vikings captain Moses Zoremmawia lakluh belh chunga final luh loh erawh inenfiah an ngai hle.