Juve leh Ronaldo an kal zel

Serie A hmahruaitu Juventus chu hneh loh nei loin an kaltluang zel. Turin club hian table laihawla awm Fiorentina chu 3-0 a sawpin an hmahruina an sawhnghet a, pahnihna ni lai Napoli aiin point 11 ngawtin an sang ta.

Inrinni zan Fiorentina khelmuala inkhelah Juve tan Rodrigo Bentancur chuan Paulo Dybala nena an in one-two hnuah yard 18-a hla aṭangin goal hmahruai a khung a, thla 18 chhunga a goal hmasa ber ni turin defender Giorgio Chiellini-a'n a tauh lut ve bawk.

Premier League leh La Liga lama goal khung thei bik a nih zia lantir fo tawhtu Cristiano Ronaldo chuan hun tawp hma deuhin Serie A bika a goal 10 nan penalty a chhuih lut bawk a ni.

Pound maktaduai 99 man Ronaldo hian Juve tan a legaue match hmasa 14 aṭangin goal 10 a nei thei a, John Charles (1957) hnuah hetiang dinhmun luah leh thei hmasa ber a ni - season kal laiah Genoa forward Krzysztof Piatek nen an goal khung zat a intluk mek.

Portuguese forward hian kum 2018 chhung bik hian legaue goal 32 a khung tawh a, Europe league lian panga zingah amah tluk phak an awm lo. Barcelona captain Lionel Messi (28 goals) chu amah hnaih bertu a ni.

Juve manager Massi-miliano Allegri chuan, "Player ṭha tak, chak duhna thinglung pu kan nei hi a vanneihthlak hle. Inkhelh harsatna hmunah kan leng lut a ni a, chuti chung chuan a tir aṭanga a tawp thlengin a chungnung zawk kan ni. Thawhrimna rah chu a tawpah a thlum bik ṭhin," a ti.

Tun hnai season sarih chhung chu Juventus hian league nomawi an chawi tawh a, season kal laia an match khelh tawh 14 zinga 13 zetah hnehna an chan theih avangin a zawna a vawi riat nan an champion a rinawm

tawh hle.