Mizoram an chak awlsam

National Junior Football Champ-ionship (BC Roy Trophy)-ah Mizoram chuan Inrinni khan an match hmasa berah Uttarakhand chu 5-0 in an sawp a, group D inkhel dangah Kerala chuan Chhattisgarh 3-0 in an hneh bawk.

Cuttack, Odisha-a inkhelah hian Mizoram tan Emmanuel Lalchhanchhuah chuan minute ngana lekah an khung nghal a, first half-ah Lalhmingchhuanga Hauhnar (30') leh Lalhruaipuia (45') ten an khung belh bawk. Second half-ah R. Lalhmingmawia (65') leh John Lalmuanpuia (90') ten khung belh lehin goal nga an khung.

Mizoram hian vawiin chawhma dar 10:00 hian Chhattisgarh an hmachhawn dawn a, an match hnuhnung berah Kerala nen December 5 hian an inkhel ang.

Mizoram coach Lalremtluanga chuan, "Bandh vangin kan duh hunah kan thleng lo a, Ningani zinga lama thlen inbeisei kha tlaiah kan thleng chauh. Zirtawpni chauh training-na hun kan nei a, hetah hian in recover nan kan hmang. Amaherawhchu thla khat tawp Mizoramah training kan nei hman a, kan match hmasa berah pawh training ṭha kan neih hi kan hlawkpui hle," tiin Vanglaini a hrilh.