Man City leh United inthlauhna point 16 ; Mourinho-a'n a naute a duhkhawp ta lo!
Premier League season chanve em pawh an la khel lo a, hmahruaitu Manchester City leh an hmelma Manchester United inthlauhna chu point 16 zet a ni ta. Match 24 khelh hmabak an la neihah eng tiangin nge thil a thlen chhoh zel dawn tih chu hriat châkawm tak a ni.
Inrinni zan EPL inkhelah Man City hian an mikhual Bournemouth chu 3-1 in an hneh a, he tih lai hian Man United erawh Southamton laka si hnih an phurh hnuah sut zo leh hramin 2-2 in an inhnehtawk thung.
United an nep!
Manchester United manager Jose Mourinho chuan hnehna an chan zawh loh hnuah a naute chu hnehna chan châka tuihal tawk lohah a ngai a, a naute chu an rilru put hmang tidanglam turin a duh a ni.
Inkhel tir lam minute 20 chhung lekin Saints lamin Stuart Armstrong leh Cedric Soares te hmangin goal an khung nghal. United tlarhnung laia awm Phil Jones leh Nemanja Matic te tan hna a awlsam lo tih a chiang.
Khualmualah Man United an ngui a, he tih lai hian rawlthar thaza awm chhun nia lang Marcus Rashford chuan Romelu Lukaku leh Ander Herrera te goal khung tur siam sakin chawlhlawk hmain an siphurh an sut zo a, a hnu lamah erawh goal dang an khung zui tawh bik lo.
United manager Mourinho chuan, "Kan khelh dan phung hi a ni ber lo, player ten chak duhna thinlung an nei tur a ni. A nihna tak sawi chuan ball chan chak a tlan kual bakah rim taka khingpuite nawr an awm lo a, a huna chak taka tlan thei kan nei mumal lo bawk," tiin a naute chu na takin a sawisel a, hetih lai hian Rashford chu fak phu awm chhun ni hialin a sawi thung.
Mourinho naute hi league table-ah pasarihna an ni mek a, Champions League khel phak china awm Chelsea an phak lohna chu point ruk niin, Blues hian match khatin an khel tlem zawk. Mark Hughes-a enkawl Saints erawh a hniam lam pathumna an la ni thung.
Manchester United midfielder Ander Herrera chuan, "Tunah chuan table dinhmun hi theihnghilh rih a hun a, match khelh hmabak kan neih zawng zawngah hnehna chan kan tum ang. Nilaini zana Arsenal nen kan inkhelh tur hi kan tan chuan final anga pawimawh a ni," a ti.
Champion zia
Tun hnai ni 44 chhungin Manchester City-in match 13 an khel a, tun thla chhungin inkhel hmachhawn tur an la ngah bawk. Pep Guardiola-a'n player an chau thei tih a chiang a, an mikhual Bournemouth lakah thutlukna huaisen a siam.
Lyon nen Champions League an khelh ṭum
player inlan player panga ngawt a siksawi a, striker rinrawl Sergio Agureo chu squad-ah telh a ni lo a, midfielder tawnhriat nei ṭha David Silva chu bench-ah dah a ni bawk.
Hneh lo nei loa kaltluang City hian an player langsar ṭhenkhat tel lo pawhin inkhel an thunun bakah Bernardo Silva hmangin goal hmahruai an khung thei tho a, mikhual lamin Callum Wilson hmangin sut ve mah se Raheem Sterling leh Ilkay Gundogan te hmangin an chhanglet.
Man City manager Guardiola chuan, "Bournemouth kha team ṭha tak niin an tlarhma an hlauhawm hle a, kan nawr na ngam lo. Keini aiin an palen bakah thrum an ngah zawk a, khami hmang tangkai tur khan long ball an pet nasa.
"Hun tawp lam minute 20 chhung kha chuan kan khel ṭha tawk lo, goal dang chhuah belh thei pawh kan ni. Chutih rualin inkhel harsa takah hnehna kan chang thei a, hetiang huna point thum hmuh hi ka duhdan a ni," tiin a sawi.
Spanish manager chuan tun hnai a match hnuhnung 10 aṭanga goal sarih khungtu Aguero chungchang sawi zuiin, "Aguero hi a fit dawn em tih ka chiang rih lo, kei chuan doctor leh physio te thurawn angin thutlukna ka siam mai ṭhin," a ti. Watford nen an inkhelh hunah Argentine striker hi a chawl rih a nih pawhin a mak lo ang.