Ronaldo leh Portugal ten World Cup an khel dawn

umin FIFA World Cup-ah khawvel player ṭha pahnih Cristiano Ronaldo leh Lionel Messi te a vawi nga nan an inlan dawn a, football ngainatute tan chanchin lawmawm a ni.

Portugal-in Qatar zin turin playoff an khelh a ṭul a, Thawhlehni zan khan European champion Italy hnehtu North Macedonia 2-0 in an hneh. Manchester United midfielder Bruno Fernandes-a'n goal hnih a khung a, goal hmasa zawk hi Ronaldo siamsak a ni.

Zawlnei Ronaldo
Playoff final khelh hmain Cristiano Ronaldo chuan, "Portugal tel loin World Cup a awm dawn lo," tiin a sawi. North Macedonia-in team ṭha zawka ngaih Italy an hneh sak tawh a, Manchester United forward a ṭawng pawr hle.

Kum 37 mi Ronaldo hian kum 2006 aṭang khan World Cup hi a khel tawh a, football inelna lian ber hi a hmaih ngai lo. Ronaldo ang bawka footballer ropui Lionel Messi pawhin kum 2006 aṭangin World Cup-ah a la inlan ziah.

Messi telna Argentina-in nikum November 16 khan Qatar zin theihna ticket an nei tawh. Portugal erawhin kawng thui zawk an zawh a, Ronaldo-a'n a sawi lawk ang ngeiin a tawpah an tling. Player ropui pahnih hian World Cup nomawi an la chawi lo a, inelna an ti ngaihnawm sawt ang.

Fernandes zawk
Football ngainatuten Estadio do Dragao lam an thlir a, an mit fukna chu Ronaldo a ni. Amaherawhchu, Ronaldo aiin Manchester United tana a khelhpui Bruno Fernandes a langsar zawk.

Italy hnehtu North Macedonia-in thilmak thlen nawn turin ṭan an khawh a, mualneitu Portugal erawhin team ṭha zawk an ni tih an pholang. Ronaldo-a'n Otavia hnen aṭanga a ball hmuh chu goal zawnah a pet lo a, Liverpool forward Diogo Jota pawhin a khung thei bik lo.

Minute 32-naah Fernandes-a'n North Macedonia player ball pass sual chu chang fuhin Ronaldo nen wall pass hmangin tlarhnung an ṭhiat. Fernandes hian Ronaldo hnen aṭanga a ball hmuh chu ṭha zetin a pet goal.

Second half-ah North Macedonia an insiamṭha hret a, amaherawhchu Portugal keeper Diogo Costa an tibuai pha lo. Minute 65-naah counter attack hmangin Portugal-in goal hnihna a khung a, Jota ball vawrhluh chu Fernandes-a'n chak nemngheh nan a khung.

Lawm leh lungawi
Portugal tana goal khungtu Bruno Fernandes chuan, "World Cup kan khelh theih phahna a nih avangin kan inkhel hi ka hre reng tawh ang. Inkhel pawimawh a ni a, kan fan-te chet dan kha sawisel bo a ni. Boruak nuam tak hnuaiah kan khel a, fan leh player-te khan kan duh kha kan chiang," tiin a sawi.

Portugal coach Fernando Santos chuan, "Nomawi vawi hnih ka chawi tawh a, pathumna chawi theih ka beisei. Ka player-te hi an rilru put hmang avangin ka fak. Inkhelh ṭantirh minute 10 chhung kha chu kan duh angin kan khel thei lo a, North Macedonia-in inkhelh dan tur an thiam. A tawpah erawh mipui puihna leh player-te zarah hnehna kan chang," tiin a sawi. Santos hnuaiah hian Portugal-in Euro C'ship leh Nations League nomawi an chawi tawh.

North Macedonia coach Blagoja Milevski chuan, "Ka player-te khelh danah ka lungawi. September thla aṭanga tun thlenga kan khelh dan hi a chhuanawm. Theihna sang tak kan nei tih kan pholang a, Europe team ṭha zinga tel turin hma kan sawn zel," tiin a naute chunga a lungawi thu a sawi.

Ngaihnawm
• Portugal-in a zawnin vawi ruk FIFA World Cup a khel tawh a, Cristiano Ronaldo a tel hnuah an la khel vek.
• Portugal hian 2010 leh 2014 khan playoff hmangin World Cup-ah an inpettling tawh. Tun ṭum hi playoff hmanga vawi thum an inpettlinna a ni.
• Bruno Fernandes-a'n North Macedonia hma hian competitive match-ah goal hnih chiah a la khung. Manchester United forward hian friendly match-a a khung nen Portugal tan match 42 aṭangin goal riat a khung tawh thung.